ԵՐԵՎԱՆ, 1 փետրվարի — Sputnik. 2019թ-ին Հայաստանում սպառողական վարկերի քանակը աճել է։ Դրանք հիմնականում օգտագործված մեքենաներ գնելու վարկեր են (ավտովարկերը ձևակերպվում են որպես սպառողական. այդպես հնարավոր է մեքենան գրավի տակ չդնել ավելի արագ վաճառելու համար)։
2020թ–ից Հայաստանն անցում է կատարում ավտոմեքենաների եվրասիական, ավելի բարձր տուրքերի, ուստի 2019թ–ին ոմանք մեքենա են գնել իրենց համար, շատերը` վերավաճառելու նպատակով (գնելով միանգամից մի քանի ավտոմեքենա)։
Առայժմ հասկանալի չէ` կստացվի վաճառել դրանք, թե ոչ. ընդամենը մի տարում հանրապետություն են ներկրել 190 հազար ավտոմեքենա։ Վտանգ կա, որ չի հաջողվի վաճառել (կամ կհաջողվի, բայց մի քանի ամիս ուշ և 1000-2000 դոլարով էժան)։ Իսկ այդ ընթացքում ավելի բարդ կլինի մարել այդ մեքենաների գնման նպատակով վերցրած վարկերը։
«Չեմ կարող բացառել, որ երկրորդային շուկայում կարող է պղպջակ գոյանալ: Մենք ինքներս զգույշ ենք եղել և այդքան ակտիվորեն չենք վարկավորել այդ շուկան։ Առաջին հերթին վարկավորել ենք դիլերային սրահներից ավտոմեքենա գնելը։ Իսկ այստեղ մենք ռիսկեր չենք տեսնում»,– Sputnik Արմենիայի հետ զրույցում ասաց «Ամերիաբանկի» գլխավոր տնօրեն Արտակ Հանեսյանը։
ԵԱՏՄ–ին ասենք` դուք աչք փակեք, մենք փող աշխատենք. ղազախները Հայաստանից ավտոմեքենա չեն տանի
Հիշեցնենք, որ մինչև 2020թ–ը մեքենաների 90 տոկոսը, որոնք ներկրվում են Հայաստան, օգտագործված են եղել (7 տարեկանից բարձր) և մատչելի (մինչև 5 հազար դոլար)։ Դրանք սովորաբար գնում են ոչ թե ավտոսրահներում, այլ «ձեռքի վրայից» (ավտոասրահներից առևտրին բաժին է ընկնում ընդամենը մի քանի տոկոս)։
«Տեսականորեն ամեն ինչ կարող է լինել, ուղղակի մենք նույնպես ակտիվորեն վարկավորել ենք այդ հատվածը», – ասաց Արմսվիսբանկի գլխավոր տնօրեն Գևորգ Մաչանյանը։
ACBA Credit Agricole բանկի տնօրեն Հակոբ Անդրեասյանի կարծիքով` երկրորդային շուկայում ավտոմեքենաների նկատմամբ հետաքրքրությունը պահպանվում է, ուստի տագնապի պատճառ չկա։
«Չէի ուզի միանշանակ գնահատականներ տալ, որովհետև դրանք կարող են ազդել շուկայի վրա։ Բայց ամեն դեպքում նկատվում է ավտոմեքենաների վաճառքի ակտիվություն», – նշեց նա։
Նշենք, որ 2018թ–ի նոյեմբերից մինչև 2019թ–ի նոյեմբեր Հայաստանում սպառողական վարկերի ծավալն աճել է ավելի քան մեկուկես անգամ (55 տոկոսով)` կազմելով 433,9 միլիարդ դրամ։ Այդ աճը հիմնականում պայմանավորված է ավտովարկերի ավելացմամբ։
