ԵՐԵՎԱՆ, 30 հունվարի — Sputnik. Մարդու իրավունքների պաշտպան Արման Թաթոյանն ընդունել է 10-ամյա տղային և նրա մորը, որը պնդում է` տարիներ շարունակ իր երեխային պարբերաբար բռնաբարել են։ Facebook սոցիալական ցանցի իր էջում նման հրապարակում է արել Թաթոյանը։
Օրեր առաջ «Հայկական ժամանակն» ահասարսուռ հոդված էր հրապարակել, ըստ որի` Երևանի բնակչուհի Աիդա Ա․-ն պնդում է, որ իր 10-ամյա որդին պարբերաբար ենթարկվել է սեռական բռնության: Մայրը վստահ է, որ որդու բռնաբարությունը կազմակերպել են երեխայի տատիկը՝ իր մայրը և երեխայի հայրը: Երեխան իր ցուցմունքներում նշել է, թե որտեղ, երբ, ինչպես են տեղի ունեցել այդ «վատ բաները», մատնանշել «իրեն ցավեցնող» երեք մեծահասակներին:
«Թաթոյանը երեկ իր նախաձեռնությամբ ընդունել է գործում ներգրավված փաստաբանին, երեխային և նրա մայրիկին։ ՄԻՊ–ն առանձնազրույցներ է ունեցել ինչպես երեխայի, այնպես էլ վերջինիս մայրիկի հետ»,–նշված է հաղորդագրության մեջ։
Երեխայի հարցը գտնվելու է Մարդու իրավունքների պաշտպանի անմիջական ուշադրության կենտրոնում։ Գրություններ են հասցեագրվելու ոստիկանություն, Քննչական կոմիտե և իրավասու այլ մարմիններ։
Հիշեցնենք, որ 10-ամյա տղայի մայրը հայտնել է, որ 2016թ.-ին հարուցված քրեական գործը կարճվել է: 2019-ին, սակայն, տղային նորից բռնաբարել են։ Այս անգամ հարուցված քրեական գործը դեռ նախաքննության փուլում է:
Կծելուց ու կսմթելուց մինչև բռնաբարություն. ինչ է ընտանեկան բռնությունն ու ինչու չլռել
Երբ առաջին անգամ մայրը դիմել է իրավապահներին, նշանակվել է կոլոնոսկոպիայի դատաբժշկական փորձաքննություն։ 2016թ.–ի հունիսի 26–ին փորձաքննությունն արձանագրել է, որ առկա է «հետանցքի ձագարաձև ներհրվածություն, որ կարող էր առաջանալ պարբերաբար սեռական հարաբերություններ ունենալու հետևանքով»։
Մայրը նաև պարզել է, որ տղային բռնաբարում են այն ժամանակ, երբ ինքը տանը չի լինում և տատիկի մոտ է թողնում երեխային։ Ավելին, երեխան տեսել է, թե ինչպես են տղամարդիկ գումար տալիս տատիկին։ Տատը, ըստ երեխայի, վախեցրել է նրան ու ասել, որ եթե որևէ մեկին պատմի այդ մասին, կասի տղամարդկանց, որ «ավելի շատ ցավեցնեն» նրան։
Երեխայի մայրը պատմել է նաև, որ մայրն իրեն էլ 11 տարեկանում է հանձնել ամուսնուն. կինն իր տղային ունեցել է անչափահաս տարիքում։
Նորածնի հայրն անչափահաս աղջկա ծնողն է. 13–ամյա աղջկա հղիության մասին նոր մանրամասներ
