ԵՐԵՎԱՆ, 6 օգոստոսի- Sputnik. 2019 թվականի առաջին կիսամյակի ընթացքում ՀՀ քննչական կոմիտեի վարույթում քննվել է երեխաների նկատմամբ կատարված հանցագործությունների դեպքերով հարուցված 209 քրեական գործ։
Ինչպես տեղեկացանք ՀՀ քննչական կոմիտեի պաշտոնական կայքից՝ դրանցից 4-ը եղել են սպանության, 2-ը՝ անզգուշությամբ մահ պատճառելու, 3-ը՝ ինքնասպանության հասցնելու, 5-ը՝ դիտավորությամբ առողջությանը ծանր վնաս պատճառելու, 38-ը՝ ծեծի, 1-ը` ֆիզիկական ուժեղ ցավ կամ հոգեկան ուժեղ տառապանք պատճառելու, 2-ը՝ ազատությունից ապօրինի զրկելու մեղադրանքով։
Գրանցվել է նաև 3 բռնաբարության, 10 սեքսուալ բնույթի բռնի գործողությունների, անչափահասի նկատմամբ սեռական հարաբերության կամ սեքսուալ բնույթի գործողություններին հարկադրելու 1 դեպք և անչափահասի նկատմամբ անառակաբարո տարբեր գործողությունների կատարման 37 դեպք։
Մանկապղծությունն ու մանկական բռնությունը Հայաստանում. վիճակագրություն
Հարուցված քրեական գործերով՝ 110 անձ ներգրավվել է որպես մեղադրյալ, նրանցից 5–ը եղել են 14-16 տարեկան, 2-ը՝ 16-18 տարեկան, 63-ը՝ 18-35 տարեկան, 40-ը՝ 35 տարեկանից բարձր:
193 անձ ճանաչվել է տուժող, որոնցից 105-ը՝ մինչև 12 տարեկան, 20-ը՝ 12-14 տարեկան, 36-ը՝ 14-16 տարեկան, 32-ը՝ 16-18 տարեկան:
