ԵՐԵՎԱՆ, 29 հունվարի — Sputnik. Չինաստանի Ուհան քաղաքում, որտեղից սկսվել է կորոնավիրուսի տարածումը, այժմ 6 հայ կա. նրանցից երեքն ուսանող են, իսկ մյուս երեքը` պայմանագրով աշխատողներ։ Այս տեղեկությունը լրագրողների հետ հանդիպման ժամանակ հայտնեց «Հիվանդությունների վերահսկման և կանխարգելման ազգային կենտրոնի» վարակիչ հիվանդությունների և համաճարակաբանության բաժնի պետ Լիանա Թորոսյանը։
«Մեր արտաքին գործերի նախարարության հետ սերտ աշխատում ենք և հավաքագրում Չինաստանում գտնվող հայերի մասին տեղեկատվությունը։ Ուհանում գտնվող հայերին հորդորել ենք, որ մշտական կապ պահպանեն ԱԳՆ–ի հետ, դիմեն բուժաշխատողների, եթե հիվանդացության որոշակի նախանշաններ կլինեն»,–ասաց Թորոսյանը։
Նրա խոսքով` այս պահին տեղի հայերը առողջական որևէ խնդիր չունեն, քանի որ տնից դուրս չեն գալիս, հետևում են իրենց սննդակարգին` ծովամթերք կամ կենդանական ծագման մթերք չեն ուտում։
Մասնագետը հայտնեց նաև, որ կորոնավիրուսի` հիվանդ մարդուց առողջ մարդուն փոխանցվելու դեպքեր արդեն իսկ գրանցվել են։ Ավելին` վարակի փոխանցման դեպք կա նաև բուժաշխատողների շրջանում։ Ինչ վերաբերում է վարակից մահանալու դեպքերին, ապա դրանք հիմնականում գրանցվում են այն մարդկանց մոտ, որոնք ունեն համակցված հիվանդություններ:
Առողջապահության փոխնախարար Լենա Նանուշյանն էլ ասաց, որ Առողջապահության համաշխարհային կազմակերպությունը հայտնել է` կորոնավիրուսի տարածման առումով աշխարհում արտակարգ վիճակ չէ, այդ առումով արտակարգ իրավիճակ միայն Չինաստանում է:
Փոխնախարարի խոսքով` վարակի տարածման կանխարգելման համար այժմ քննարկումներ են ընթանում ԱՊՀ երկրների հետ: Իսկ լուրերը, թե Վրաստանում կորոնավիրուսով վարակվելու դեպք է հայտնաբերվել, չեն համապատասխանում իրականությանը:
«Հատուկ դիմակները վերջացել են». Չինաստանում գտնվող հայ երիտասարդը` կորոնավիրուսի մասին
Հիշեցնենք, որ Չինաստանում արդեն իսկ 5997 մարդ է վարակվել կորոնավիրուսով, գրանցվել է մահվան 132 դեպք: Նշվում է, որ վարակի տարածման աղբյուր կարող է լինել ծովամթերքը։
Հիվանդության հիմնական ախտանիշներն են ջերմությունը, հոգնածությունը, խորխով հազը։ Հիվանդությունը սկսվում է որպես սովորական շնչառական վարակ, որն ուղեկցվում է տենդով, հազով ու թոքաբորբով, բայց շատ արագ ծանր ընթացք է ստանում՝ խոցելով թոքերը։
Ջերմաչափում և արտաքին զննում. կորոնավիրուսի ներթափանցումը Հայաստան պետք է բացառել
