ԵՐԵՎԱՆ, 22 հունվարի — Sputnik. Հայաստանում գործող սպանդանոցների քանակն այս պահին բավարար չէ։ Այսօր ԱԺ–ում կառավարության հետ հարց ու պատասխանի ժամին հայտարարեց ՀՀ վարչապետ Նիկոլ Փաշինյանը։
«Որովհետև մենք անընդհատ հետաձգում ենք այս որոշման ընդունումը, և մարդիկ, ովքեր մտադիր են այս ոլորտում ներդրում անել կամ ներդրման պրոցեսի մեջ են, մտածում են` կարող է փող ծախսեմ, սպանդանոցը կառուցեմ, մեկ էլ պարզվի, որ կառավարությունն այս որոշումը չեղյալ է արել»,– ասաց նա` հիշեցնելով, որ վերջին 1.5 տարվա ընթացքում սպանդանոցների մասին որոշման ժամկետը 2 անգամ հետաձգվել է։
Մյուս կողմից, վարչապետի խոսքով, կան «սիրելի հայրենակիցներ», որոնք դեմ են սպանդանոցներին։ Փաշինյանը հայտնեց, որ կառավարությունում այսօր քննարկվել է խնդիրն ու տրվել հանձնարարական։
«Մինչև ս.թ. փետրվարի 6-ը կառավարությունը կդիտարկի սուբսիդավորվող վարկերի ու լիզինգային ծրագրերի այնպիսի կարգավորումներ, որ սպանդանոցների կառուցման ու տեխնիկայի ձեռք բերման համար ստեղծվեն լավագույն պայմաններ։ Բացի այդ կառավարությունը մարզպետարանների ու ՍԱՊԾ–ի հետ կձևավորի սպանդանոցների նախընտրելի քարտեզ ու կփորձենք առավել հասցեական ֆինանսավորել այն նախագծերը, որոնք լուծում են սփռվածության ու հասանելիության խնդիրը»,– ասաց Փաշինյանը։
Սպանդանոցների հարցին վերջնական պատասխան կտա Փաշինյանը
ՀՀ վարչապետն ԱԺ ամբիոնից դիմեց սպանդանոցների մասին որոշումից դժգոհ քաղաքացիներին` նրանց առաջարկելով մինչև հուլիսի 1-ը ձեռնարկել առաջարկված բոլոր քայլերը, բայց պայմանով, որ հուլիսի 1-ից հետո այդ թեմային վերադարձ այլևս չի լինելու։
Իսկ մինչև փետրվարի 6-ը կառավարությունը բաց է լսելու նաև մսավաճառների ու ֆերմերների առաջարկները` խնդրի լուծման մասին։
«Սպանդանոցային մորթն այլընտրանք չունի». Գեորգի Ավետիսյան
Հիշեցնենք` ս.թ. հունվարի 15-ից ուժի մեջ է մտել կառավարության ընդունած որոշումը, որի համաձայն` ՀՀ ողջ տարածքում վաճառվող միսը պետք է ունենա սպանդանոցում մորթված լինելը հավաստող փաստաթուղթ, ինչն անվտանգության երաշխիք է։
Հունվարի 15-ին որոշման դեմ բողոքող ֆերմերները հայտարարում էին, որ սպանդանոցները մորթի դիմաց չափազանց մեծ գին են պահանջում, բացի այդ, շատ տեղերում դրանք ընդհանրապես բացակայում են, և անասուն մորթելու համար ֆերմերը ստիպված է լինում տասնյակ կիլոմետրեր անցնել։
