ԵՐԵՎԱՆ, 21 հունվարի — Sputnik. ՀՀ դատախազությունը հայտնում է, որ իրավաբանական անձանց կողմից Երևանի քաղաքապետարանին նվիրաբերություններ կատարելն ինքնին ՀՀ քրեական օրենսգրքով չթույլատրված որևէ արարքի հատկանիշներ չի պարունակում։
Դեռ նախորդ տարի հայտնի դարձավ, որ մի շարք ընկերություններ Երևանի քաղաքապետարանին աղբահան մեքենաներ են նվիրել։ Նվիրրատուների ցանկում էին «Ալեքս ընդ հոլդինգ» ՍՊԸ–ն, Սարգիս Խուրշուդյանը և Հայրապետ Հովհաննիսյանը, «Ն և Ս Քոնսթրաքշն» ՍՊԸ–ն, ՀՀ–ում Չինաստանի դեսպանությունը, «Էյչ բի Էմ գրուպը»։ Մամուլում լուրեր էին շրջանառվում, որ քաղաքապետարանին ընկերությունները մեքենաները նվիրել են շինարարական թույլտվություն ստանալու դիմաց։
Ոչ միայն «ԿամԱԶ», այլև ձնամաքրման մեքենաներ. թեման նոր զարգացումներ է ստանում
«Պարզվել է, որ «Տերյան 5», «Ն և Ս Քոնսթրաքշն», «Էյ ընդ Փի գրուպ», «Էյչ ԲԻ Էմ գրուպ» ՍՊԸ–ին, «Ջերմուկ Գրուպ» ՓԲԸ–ն և ՀՀ-ում Չինաստանի դեսպանությանը տրամադրվել են նախագծման, քանդման և (կամ) կառուցապատման թույլտվություններ։ Իսկ քաղաքացի Շողերինա Մկրտչյանի ինքնակամ կառույցը օրինականացվել է: Նշված գործընթացներն իրականացվել են օրենսդրության պահանջների պահպանմամբ և դրանցում խախտումներ չեն հայտնաբերվել»,–հայտնում են դատախազությունից։
Պարզվել է նաև, որ, օրինակ, շինության նախագծման թույլտվությունը «Տերյան 5» ՍՊԸ–ին տրվել է 2017թ.՝ սահմանելով շինության վերգետնյա բարձրության մինչև 75.4 մետր (21–22 հարկանի շենք), սակայն 2019թ. տրված շինարարության թույլտվությամբ սահմանվել է բարձրության ավելի պակաս՝ 56 մետր (16 հարկանի շենք)։ Իսկ նվիրաբերություն կատարած «Ավանգարդ Մոթորս» ՍՊԸ-ին կամ դրան փոխկապակցված անձանց Երևանի քաղաքապետարանի կողմից շինթույլտվություններ չեն տրամադրվել:
Դատախազությունը հայտնում է նաև, որ ՀՀ-ում Չինաստանի դեսպանությունը, «Ն և Ս Քոնսթրաքշնը», «Էյչ ԲԻ ԷՄ գրուպը», «Ավանգարդ Մոթորս» ՍՊԸ–ն, ինչպես նաև «Ալեքս էնդ Հոլդինգը», որը, ըստ հրապարակումների, կապված է «Էյ ընդ Փի գրուպ» ՍՊԸ և քաղաքացի Շողերինա Մկրտչյանի հետ, Երևան համայնքին նվիրաբերել են 19 տրանսպորտային միջոց, այդ թվում՝ աղբատար։ «Տերյան 5» ՍՊԸ-ն նվիրաբերության պայմանագրով պարտավորվել է նվիրաբերել անշարժ գույք:
Այնուամենայնիվ, դատախազությունը քաղաքապետարանին առաջարկել է կիրառել այնպիսի ընթացակարգեր, որոնք կապահովեն այդ գործընթացների իրավական հիմնավորվածությունը, անհրաժեշտ թափանցիկությունն ու հրապարակայնությունը:
Հիշեցնենք` Երևանի ավագանու «Լույս» խմբակցության ղեկավար Դավիթ Խաժակյանը հայտնել էր, որ գործարար Սամվել Ալեքսանյանը քաղաքին երկու տասնյակ «ԿամԱԶ» մակնիշի բեռնատարներ նվիրաբերել: Քաղաքապետի մամուլի խոսնակ Հակոբ Կարապետյանը հերքել էր այդ տեղեկությունը` նշելով, որ քաղաքապետարանը Սամվել Ալեքսանյանից առհասարակ նվեր չի ստացել։ Ավելի ուշ Կարապետյանը հրապարակել էր քաղաքապետարանին տրված նվիրատվությունների ցանկը, ըստ որի` «Ալեքս ընդ հոլդինգ» ՍՊԸ–ն 3 «ԿամԱԶ» էր նվիրել քաղաքապետարանին։
Նշենք, որ Սամվել Ալեքսանյանը բազմիցս հայտարարել է, որ ինքը որևէ բիզնես չունի։ Սակայն հայտնի է, որ «Ալեքս հոլդինգը» փաստացի պատկանում է նրան։
«ԿամԱԶ»–ների գնման մեջ գումա՞ր են աշխատել. Երևանի քաղաքապետարանի պարզաբանումը
