ԵՐԵՎԱՆ, 15 հունվարի - Sputnik. Մագիստրատուրայում սովորող ուսանողները կկարողանան հետ ստանալ իրենց աշխատվարձերից գանձվող եկամտահարկը։ Այս արտոնությունն առայժմ միայն օրենսդրական առաջարկի տեսքով է։ Օրենքի նախագծի հեղինակներն ԱԺ «իմ քայլը» խմբակցության անդամներ Սիսակ Գաբրիելյանն ու Լիլիթ Մակունցն են։
«Մենք սրանով նախ խրախուսում ենք աշխատանքը։ Հաճախ մենք ունենք այնպիսի մոտեցում, որ ուսանողների վարձավճարը, այդ թվում նաև մագիստրատուրայում, հոգում են նրանց ընտանիքի անդամները, ծնողները։ Մենք գտնում ենք, որ մագիստրատուրայի ուսանողներն արդեն այն կարգավիճակում են, որ կարող են աշխատել ու վճարել իրենց ուսման վարձը։ Եվ սա նաև մտածողություն է ձևավորում»,– ԱԺ տնտեսական հարցերի հանձնաժողովի այսօրվա նիստում նախագիծը ներկայացնելիս ասաց Լիլիթ Մակունցը։
Օրինագծի հեղինակները նշեցին, որ կառավարության հետ նախագիծը քննարկվել է և գործադիր իշխանությունն է որոշելու, թե ինչ չափով ու որ մասնագիտությունների համար կսահմանվի արտոնությունը։
Ավելի քան 300 աշխատատեղ` ուսանողների համար. կայացավ աշխատանքի տոնավաճառը
Նախատեսվում է, որ օրենքն ընդունվելու դեպքում այն կկիրառվի արդեն 2020թ.–ի սեպտեմբերից։ Ընդ որում, չի բացառվում, որ կառավարությունը համաձայնի արտոնությունը տարածել նաև մագիստրատուրայի երկրորդ կուրսում սովորողների վրա։
Կառավարության ներկայացուցիչ, ֆինանսների նախարարի տեղակալ Արման Պողոսյանը նշեց, որ կրթությունը չափազանց կարևոր է, բայց իրենք համոզված չեն, որ ուսանողները չեն աշխատում միայն այն պատճառով, որ ստիպված են իրենց աշխատավարձից եկամտահարկ վճարել։
Ինչ են մտածել սփյուռքահայ ուսանողները գյուղը զարգացնելու և երկիրն անվտանգ պահելու համար
«Մեր կարծիքով` կան շատ ավելի ուրիշ պատճառներ, մասնավորապես` աշխատանքային փորձի բացակայություն, որակավորման բացակայություն, ազատ ժամանակի բացակայություն, կամ ի վերջո ցանկության բացակայություն, աշխատաշուկայի հագեցվածություն»,– ասաց փոխնախարարը։
Պողոսյանը նաև մտավախություն հայտնեց, որ օրենքի ընդունման պարագայում եկամտահարկի վերադարձի առաջարկություններ կլինեն նաև վերապատրաստման տարբեր ծրագրերի մասնակցող աշխատողների համար։
Սա, նրա խոսքով, նաև լրացուցիչ բեռ է պետության համար։
«Միայն կրթության ոլորտի հարկային ծախսերը ԱԱՀ–ի գծով 2020թ.–ի բյուջեում կազմում են 26.9 մլրդ դրամ։ Այսինքն` այսքան գումար այսօր կրթության ոլորտից արդեն չի հավաքագրվում»,– ասաց նա։
Տնտեսական հանձնաժողովի նախագահ Բաբկեն Թունյանը նկատեց, որ օրինագիծն ավելի ճիշտ կլիներ քննարկել կրթության հարցերի հանձնաժողովում և ոչ թե տնտեսական։ Նա նշեց, որ իրենք ստիպված են հարցը դիտարկել բացառապես տնտեսական էֆեկտի տեսակետից, մինչդեռ կրթությունը նաև այլ մոտեցում է ենթադրում։
«Այդուհանդերձ, ես կողմ կքվեարկեմ ու հանձնաժողովի անդամներին էլ կոչ կանեմ կողմ քվեարկել»,– ասաց Թունյանը։
Քննարկման մասնակիցները հետևեցին հանձնաժողովի նախագահի կոչին։ Օրինագիծն ընդգրկվեց լիագումար նիստերի օրակարգում։
Դրա հետագա ճակատագիրը պարզ կլինի արդեն խորհրդարանի առաջիկա նստաշրջանում քննարկվելուց հետո։
Ավելի քան 300 աշխատատեղ` ուսանողների համար. կայացավ աշխատանքի տոնավաճառը
