ՀՀ տեսչական մարմինը տարվա սկզբից անցել է ուժեղացված ռեժիմով սահմանային հսկողության և սահմանային հսկիչ կետերում ունի սանիտարահամաճարակային ապահովություն և վերահսկողություն իրականացնելու գործառույթ, բայց գնահատական տալը՝ դրանք վարակիչ հիվանդություններ են, թե ոչ, արդեն չի մտնում տեսչական մարմնի գործառույթների մեջ: Sputnik Արմենիայի հետ զրույցում այս մասին ասաց Հայաստանի Հանրապետության Առողջապահական և աշխատանքի տեսչական մարմնի ղեկավար Հակոբ Ավագյանը։
«Մենք ընդամենը կատարում ենք վերահսկողություն` կանխարգելման իմաստով: Եթե, օրինակ, վարակիչ հիվանդությունների չափորոշիչներին բնորոշ անձինք են հատում մեր սահմանը, ապա նրանց հաշվառում ենք՝ հսկելով, թե գրանցման որ հասցեում է գտնվում նրանց պոլիկլինիկան, և այդ մասին տեղյակ ենք պահում մեր տարածքային ստորաբաժանմանը, որպեսզի պոլիկլինիկան նրանց անպայման վերցնի հաշվառման»,- նշում է Ավագյանը:
Նրա փոխանցմամբ՝ ջերմաչափումներ իրականացնելը չափորոշիչներից ընդամենը մեկն է, որովհետև կան վարակիչ հիվանդություններ, որոնց առթիվ նշված է մասնագիտական ավելի մեծ ցանկ: Օրինակ՝ կարող են լինել ցանավորման ախտանշաններ, որոնք վկայում են վարակիչ հիվանդության առկայության մասին:
Ինչու էր նախկին իշխանությունը ցանկանում մասնավորեցնել մաշկավեներական վարակների կենտրոնը
Հսկողության տակ է նաև մեր օդային սահմանը: Որոշ ժամանակ առաջ գրանցվել էր մի դեպք, երբ անձի առողջական վիճակի հետ կապված եղել են կասկածներ, ուստի այդ մասին տեղեկացրել են համապատասխան պոլիկլինիկային:
«Աշխատանքի անցելու պահին կային տեղեր, որտեղ ջերմաչափիչ սարքերը չէին աշխատում կամ էլ աշխատում էին անարդյունավետ, հետևաբար, տեսչական մարմինը հետզհետե դրանք կարգավորում է, կանոնակարգվում են նաև հերթապահությունները»,- նշեց Առողջապահական և աշխատանքի տեսչական մարմնի ղեկավարը:
Բարձր ջերմություն և ցան. Վրաստանում Ամանորը նշողներից ոմանք վերադարձել են վարակված
Նա ասաց, որ վերջերս ԵԱՏՄ-ի փոխօգնության միջազգային պայմանագրի շրջանակներում տեսչական մարմինը ստացել է ավտոմեքենաներ, որոնց միջոցով նման դեպքերում վարակակիր անձինք մեկուսացվում են՝ նրանց հետ որոշակի առողջապահական գործողություններ իրականացնելու նպատակով: Մինչև այս տարվա վերջ ՀՀ սահմանային հսկիչ կետերը հագեցած կլինեն նյութատեխնիկական գործիքներով ու կարողություններով, ինչը թույլ կտա ավելի պատշաճ իրականացնել տեսչական մարմնի գործունեությունը:
