ԵՐԵՎԱՆ, 10 հունվարի — Sputnik. «Դալմա գարդեն մոլում» երեկ 30 րոպե տևողությամբ ցնցումը մարդկային գործոնի հետևանք է. Sputnik Արմենիայի հետ զրույցում այս մասին ասաց արտակարգ իրավիճակների նախարարի մամուլի քարտուղար Էդմոն Զարգարյանը։
Երեկ երեկոյան առևտրի կենտրոնում արտակարգ իրավիճակ էր ստեղծվել. շենքից տարհանել էին բոլորին, քանի որ ցնցումներ էին գրանցվել։
«Շենքում մեր մասնագետներն արդեն չափող սարքեր են տեղադրել, որոնք վաղն առավոտյան կհանենք: Դրանց միջոցով էլ պետք է որոշվի` ո՞րն էր շենքում ցնցումների պատճառը, սակայն երկու բան պարզ է` երկրաշարժ չի գրանցվել, պատահածն էլ մարդկային գործոնի հետևանք է»,–ասաց նա։
Զարգարյանի խոսքով` քանի որ առևտրի կենտրոնի հարակից տարածքում շինարարական աշխատանքներ են ընթանում, ուստի հնարավոր է` ծանր տեխնիկա է աշխատել, որն էլ շենքում ցնցում է առաջացրել։
Սարքավորումներից բացի, ըստ Զարգարյանի, մասնագետներն ուսումնասիրում են շենքի այն հատվածը, որտեղ ցնցումներ են եղել: Նա հայտնեց, որ ցնցումներն առավել նկատվել են երկրորդ հարկի մի հատվածում: Շենքի սեյսմակայունության խնդիր չի դիտարկվել։
Ճարտարապետների միության նախագահ Մկրտիչ Մինասյանի կարծիքով` «Դալմա գարդեն մոլի» շենքը բավական ամուր հիմք ունի և սեյսմակայունության առումով որևէ խնդիր չպետք է ունենա։ Շենքի հիմքը երկաթբետոնից է, հարկայնությունն էլ շատ չէ` 4 հարկ։
«Հայաթ Փլեյս Երևան» հյուրանոցի շենքում պայթուցիկ սարք չհայտնաբերվեց. լուսանկարներ
«Շենքի կմախքը լավն է, որակյալ աշխատանք է տարվել։ Ավելին, եթե սեյսմիկ առումով որևէ խնդիր ունենար, վաղուց իրեն զգացնել կտար` չէ՞ որ արդեն 8 տարի է` շահագործվում է»,–ասաց Մինասյանը։
Նա նշեց նաև, որ իր տեղեկություններով` առևտրի կենտրոնի հարևանությամբ տարվող շինարարական աշխատանքների ժամանակ պայթեցումներ են արել, որն էլ «Դալմա գարդեն մոլի» ցնցման պատճառ է դարձել։
ԱԻՆ Սեյսմիկ պաշտպանության տարածքային ծառայության շենքերի և շինությունների սեյսմակայունության բաժնի պետ Գուրգեն Նամալյանն առևտրի կենտրոնի դեպքի մասին լսելիս նախ կասկածել է, որ ցնցումները կարող են օդափոխության համար շենքի տանիքին տեղադրված սարքավորումների հետ կապված լինել։ Նա նշեց` ժամանակին «Չարենց–Սայաթ–Նովա» շենքերի անկյունի նորակառույցների բնակիչներն էլ բողոքում էին ցնցումներից, քանի որ օդափոխության սարքերը նորմալ չէին աշխատում։ Սակայն ԱԻՆ աշխատակիցներն արդեն իսկ ստուգել են օդափոխման համակարգերը և որևէ խափանում չեն հայտնաբերել։
«Շենքի ցնցումների պատճառն այս պահին ինձ համար էլ է անհասկանալի, բայց ռեալ է երկու տարբերակ` կա՛մ սարքավորում, կա՛մ էլ մեկ այլ բան է փչացել։ Եթե երկրաբանական պրոցես լիներ կամ էլ շինարարության հետ կապված խնդիր, ամբողջ շենքը կցնցվեր, և ոչ միայն մեկ հատվածը»,–ասաց նա։
Մասնագետի խոսքով` շենքը կառուցվել է շինարարական նորմերին համապատասխան, շինարարության որակն էլ բավականին լավն է։
«Դալմա գարդեն մոլի» առևտրի կենտրոններից մեկի աշխատակիցը Sputnik Արմենիայի հետ զրույցում ասաց, որ երկու տարի աշխատել է այնտեղ և նման դեպք երբեք չի եղել։ Աշխատակիցները, որոնց հորդորել են այսօր աշխատանքի չգնալ, դեռևս չգիտեն` առևտրի կենտրոնը վաղը կգործի՞, թե՞ ոչ։
Ինչպես են տարհանել Մոսկվա–Երևան չվերթի ուղևորներին. նոր տեսանյութ
«Դալմա գարդեն մոլի» ղեկավարությունը ևս հայտարարություն է տարածել, որում նշված է, որ ըստ ԱԻՆ-ի՝ շենքի ցնցման պատճառ կարող են լինել հարակից տարածքում այդ ժամանակահատվածում կատարվող շինարարարկան կամ այլ մեխանիկական աշխատանքները, ինչպես նաև օդափոխության մասնակի խափանումը:
Երևանի քաղաքապետարանից հայտնեցին` շենքի կառուցապատողը «Դալմա ինվեստ ՍՊԸ»–ն է, իսկ ճարտարապետը` Հովհաննես Մութաֆյանը։
Հիշեցնենք, որ ԱԻՆ–ը երեկ հայտարարություն էր տարածել, ըստ որի` առևտրի կենտրոնի երկրորդ հարկում ժամը 18։40-ից սկսած մոտ կես ժամ տատանումներ են եղել։ Այդ ժամանակահատվածում ո՛չ Հայաստանում, ո՛չ տարածաշրջանում երկրաշարժ չի գրանցվել։
