ԵՐԵՎԱՆ, 8 հունվարի — Sputnik. Գեղարքունիքում 10–ամյա Հրաչիկի` դռան փականից կախվելու դեպքը պատահականություն է, երեխաների` անզգույշ խաղի հետևանք։ Sputnik Արմենիային այս մասին հայտնեց Գեղարքունիքի գյուղերից մեկի ղեկավարը, որտեղ էլ բնակվում է երեխան։
Ավելի վաղ հայտնել էինք, որ հունվարի 5-ին մայրը 10-ամյա տղային հայտնաբերել է դռան փականից կախված։
«Հրաչիկն իր քրոջ հետ խաղալիս է եղել, երբ դեպքը կատարվել է։ Տանը նաև հարևանի երեխաներն են եղել։ Գյուղի տուն է, միշտ մարդաշատ։ Հետո մայրն ուժեղ բղավոցներ է լսել ու վազել երեխաների մոտ. տեսել է` երեխան կախված է դռան փականից, շնչահեղձ է լինում»,–պատմեց համայնքի ղեկավարը։
Նրա խոսքով` երեխային նախ տեղափոխել են Վարդենիսի ԲԿ, որտեղ նրան առաջին բուժօգնություն են ցուցաբերել ու «Սուրբ Աստվածամայր» ԲԿ տարել։ Համայնքի ղեկավարն անձամբ է ճանաչում երեխայի ընտանիքին ու վստահեցնում է`կատարվածը անզգուշության հետևանք է, քանի որ թե՛ Հրաչիկը, թե՛ նրա քույրը կամ նրանց ծնողները հոգեկան խնդիրներ չունեն։
Ճայթուկը պատահաբա՞ր է պայթել, թե՞ աղջնակն է այն պայթեցրել. հերթական դեպքը Շիրակի մարզում
Հրաչիկն ակտիվ և ճարպիկ երեխա է, իսկ ծնողներն օրավարձով աշխատող մարդիկ. նման դեպք ընտանիքում առաջին անգամ է պատահում։
«Այնպես էլ չի, որ երեխան սերիալներ է նայում, որ ասեմ` ինչ–որ տեսարանից ազդվել է, դրա հետևանքով նման քայլի դիմել։ Ուղղակի խաղի ժամանակ չգիտեմ ինչ են արել, մտքներով այդ պահին ինչ է անցել և երեխան տուժել է` հայտնվելով այդ դիրքում»,–ասաց համայնքի ղեկավարը։
Պայթյուն Գավառի տներից մեկում. կա տուժած. տեսանյութ
Հիշեցնենք, որ «Սուրբ Աստվածամայր» ԲԿ-ի մամուլի խոսնակ Գևորգ Դերձյանն այսօր լավ լուր էր հայտնել` ասելով, որ 10-ամյա տղան գիտակցության է եկել ու սկսել ինքնուրույն շնչել։
