Սմբատ Սաիյանի փոխանցմամբ՝ մենք ժողովրդագրական իրավիճակի առումով ունենք խնդիր, և դա գաղտնիք չէ: Ժողովրդագրական խնդիրները Հայաստանում բավականին սուր են: Եթե ժողովրդագրությունը դիտարկում ենք որպես գործընթաց, ապա այն այս պահին մի հանգրվանում է, որն ըստ էության շատ խնդրահարույց է, և մենք, ըստ Սաիյանի, կանգնած են ժողովրդագրական աղետի նախաշեմին, ինչը նախորդիվ արձանագրված իրողությունների հետևանք է:
«Անկախության տարիներին տեղի ունեցան սոցիալ-տնտեսական գործընթացներ, որոնց արդյունքում էապես կրճատվեց ծնելիությունը Հայաստանում: Եթե խոսենք թվերով, ապա 1980-ական թթ. կեսերից մինչև 1990-ական թվականները ՀՀ-ում ծնվում էր 70-80 հազար երեխա, իսկ 1985 թվականին գրանցվել է ամենաբարձր ցուցանիշը, ավելի քան 80 հազար: Անկախության տարիներին, հատկապես 90-ական թթ կեսերից, այդ ցուցանիշը սկսեց բավականին լուրջ անկում ապրել, իսկ 2001թ.-ին արձանագրվեց ամենացածր ցուցանիշը՝ շուրջ 32 հազար ծնունդ»,- տեղեկացնում է Սմբատ Սաիյանը:
Աշխատանքի և սոցիալական հարցերի նախարարի տեղակալի համոզմամբ՝ սա չէր կարող իր ազդեցությունը չունենալ դեմոգրաֆիական պատկերի վրա: Այսօր այնպիսի հանգրվանում ենք, որ ծնունակ տարիք է մուտք գործում անկախության սերունդը, որի թվաքանակը բավականին քիչ է եղել, և հենց դրանով է նաև պայմանավորված ժողովրդագրական խնդիրների ամբողջ խորությունը:
Մինչև 2 տարեկան երեխայի խնամքի համար տրվող գումարը կավելանա. նախարար
«Առաջիկա տարիներին ունենալու ենք մի իրավիճակ, երբ ոչ միայն ծնելիության մակարդակն է ցածր լինելու՝ կախված ինչ-ինչ հանգամանքներից, այլև ցածր է լինելու պոտենցիալ մայրերի, ծնողների թվաքանակը, ովքեր պետք է ունենան երեխա»,- նշում է նախարարության ներկայացուցիչը:
Ելնելով իրավիճակից՝ կառավարությունը որոշել է 2020 թվականի գարնանից երեխա ունեցող և երիտասարդ ընտանիքների համար հիփոթեքային վարկերի հետ կապված երեք նոր ծրագրեր իրականացնել, որոնք կնպաստեն ժողովրդագրական խնդիրների լուծմանը:
