Աշխատանքի և սոցիալական հարցերի նախարարությունը 2020 թվականին մեկնարկող հիփոթեքային նոր ծրագրերը մշակելիս ուսումնասիրել է միջազգային փորձը և համոզվել, որ վերարտադրողական վարքագծի վրա էական ազդեցություն ունի բնակարանային ապահովության խնդիրը։ Sputnik Արմենիայի հետ զրույցում այս մասին ասաց փոխնախարար Սմբատ Սաիյանը։
«Որքան բնակարանները մատչելի են հանրությանը, այնքան այդ երկրում ժողովրդագրական իրավիճակը համեմատաբար բարվոք է»,- ասաց նա։
Սաիյանի խոսքով` միջազգային պրակտիկայում նման խնդիրները լուծվում են այն մեխանիզմներով, որոնք առաջարկում են նաև գործարկվելիք երեք ծրագրերի հեղինակները, այսինքն՝ աջակցություն այն ընտանիքներին, որոնք արդեն ունեն հիփոթեքային վարկեր կամ ցանկանում են նման կերպ ձեռք բերել բնակարան:
«Եթե դիտարկում ենք այս տրամաբանությամբ, ապա ծրագրերը համահունչ են միջազգային փորձին ու բավականին լավ ուսումնասիրված են: Ընդ որում՝ մենք ուսումնասիրել ենք ոչ թե կոնկրետ ծրագիրն իր պատճառահետևանքային կապերով կամ ընթացակարգերով, այլ ծրագրերը դիտարկել ենք որպես նպատակային թիրախներ, որոնց շնորհիվ հնարավոր է լուծել կոնկրետ խնդիրներ»,- նշում է նա:
Կառավարությունը կխթանի ծնելիության աճը. միանվագ նպաստը կբազմապատկի, հիփոթեքին կօգնի
Փոխնախարարի տեղեկացմամբ՝ աշնանը ՄԱԿ-ի Բնակչության հիմնադրամի աջակցությամբ Հայաստան էր ժամանել փորձագետների ներկայացուցչական խումբ, որոնց հետ նույնպես քննարկվել են մասնագիտական հարցերը: Քննարկումների արդյունքում առավելապես կարևորվել է ծրագրային ուղղվածությունը, իսկ կոնկրետ ծրագրերը համապատասխանեցվել են մեր առջև ծառացած մարտահրավերներին:
Ծրագրերից առաջինը միանվագ դրամական աջակցությունն է մարզային բնակավայրերում բնակարան ձեռք բերելու համար: Երկրորդ ծրագիրը երեխա ունեցող և երիտասարդ ընտանիքների բնակարանների կանխավճարների ապահովագրությանն է վերաբերում: Իսկ երրորդ ծրագիրն այն ընտանիքների համար է, որոնք արդեն ունեն հիփոթեքային վարկեր, կատարում են վճարումներ և ծնվում է երեխա: Նշված երեք ծրագրերը ՀՀ-ում կիրականացվեն 2020 թվականից:
