ԵՐԵՎԱՆ, 30 դեկտեմբերի — Sputnik. 2019 թվականին «Հարավկովկասյան երկաթուղի» ընկերության գծի գնահատականը բարելավվել է 1 կետով՝ կազմելով 73 միավոր: Երկաթուղում շարունակվում է գծային տնտեսության և ենթակառուցվածքի բարեկարգումը, էլեկտրաֆիկացման և էներգամատակարարման, ինչպես նաև կապի և հեռամեխանիկայի տնտեսությունների արդիականացումը: Ամփոփելով 2019 թվականի աշխատանքի արդյունքները` այս մասին այսօր` դեկտեմբերի 30-ին կայացած խորհրդակցության ընթացքում ասել է «Հարավկովկասյան երկաթուղի» ՓԲԸ գլխավոր տնօրեն Սերգեյ Վալկոն:
«Հայաստանն ու Ռուսաստանը չեն ուզում խզել ՀԿԵ-ի պայմանագիրը». Փաշինյան
Կատարելագործվել են նաև երկաթուղու աշխատանքի մի շարք որակական ցուցանիշներ, մասնավորապես գնացքի միջին քաշը, որն ավելացել է 1,5%՝ մինչև 1537 տոննա, լոկոմոտիվի միջին օրական արտադրողականությունն ու վազքը, տեղամասային և տեխնիկական արագությունները:
Վալկոն նշել է, որ ավտոտրանսպորտի հետ սուր մրցակցության պայմաններում տարին երկաթուղու համար եղել է բավականին բարդ, սակայն ձեռնարկված միջոցները թույլ են տվել ապահովել դրական արդյունքները:
Հունվար-դեկտեմբերի արդյունքներով երկաթուղային բեռնափոխադրումների ծավալները կազմել են 3,2 մլն տոննա, ինչը 11,1%–ով գերազանցում է նախորդ տարվա ցուցանիշը: Ընդ որում, բեռնաշրջանառությունն ավելացել է 17,3, արտահանումը՝ 25, ներմուծումը՝ 12,5, իսկ տեղական բեռնափոխադրումները՝ 6,9%–ով:
ՀԿԵ–ին հանձնված պետական գույքն օտարվել է կառավարության որոշման պահանջների խախտմամբ
Հարավկովկասյան երկաթուղու հիմնական ձեռքբերումների շարքում «Հարավկովկասյան երկաթուղի» ՓԲԸ գլխավոր տնօրենը նշել է, մասնավորապես, Երևան-Գյումրի-Երևան երթուղում երկրորդ արագընթաց գնացքի աշխատանքի մեկնարկը, Ղալթախչի երկաթուղային կայարանի վերակառուցումը, որին ուղղվել է 60 մլն դրամ:
2020 թվականին կարևորագույն խնդիրներից Վալկոն առանձնացրել է գնացքների երթևեկության անվտանգության մակարդակի բարձրացումը, բյուջետային համակարգի և աշխատանքային ռեսուրսների կառավարման կատարելագործումը, բեռնա և ուղևորափոխադրումների նոր ծավալների ներգրավումը:
«Այդ նպատակների կատարումը կախված կլինի մեզանից յուրաքանչյուրից: Մենք շարժվում ենք դեպի զարգացում: Երկաթուղայիններին մաղթում եմ լավատեսություն, արդյունավետ աշխատանք, ընտանեկան երջանկություն և բարեկեցություն»,-ասել է «ՀԿԵ» ՓԲԸ գլխավոր տնօրենը:
Այնուհետև Սերգել Վալկոն արդյունավետ և բարեխիղճ աշխատանքի համար պարգևներ է հանձնել երկաթուղու մի շարք աշխատողների:
«Կարմիր Բլուր» կայարանի, ուղևորատար գնացքների զննման տեխկետի, «Ախթալա» քարշային ենթակայանի, «Արմավիր» կայարանի էլեկտրակենտրոնացման համակարգի անձնակազմերին շնորհվել է «Արդյունավետ տեխնոլոգիաների և էսթետիկայի ձեռնարկություն» պատվավոր կոչումները:
ՌԵ–ն հույս ունի կառուցողական լուծում գտնել ՀԿԵ–ի շուրջ ծագած վիճելի հարցերում
Հիշեցնենք` «ՀԿԵ» ՓԲԸ-ն հանդիսանում է «Ռուսական երկաթուղիներ» ԲԲԸ-ի դուստր ընկերություն և իրականացնում է Հայաստանի երկաթուղային համակարգի կոնցեսիոն կառավարումը: Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կողմերի փոխադարձ համաձայնությամբ կազմում է 30 տարի, և ևս 10 տարի երկարացման իրավունքով:
