Թե ինչպիսին կլինի 2020 թվականը, առավելապես կախված է կառավարության որդեգրած մոտեցումներից ու քաղաքականությունից, որովհետև վերջին տարիներին փորձ է արվել լուծում տալ էպիզոդիկ, ընթացիկ խնդիրներին, և այսօր էլ տնտեսական առումով չկան հստակ ռազմավարական թիրախներ: Այս մասին Sputnik Արմենիայի հետ զրույցում ասաց տնտեսագետ Կառլեն Խաչատրյանը։
«Մեզանում ռազմավարական գերակայությունները, հստակ նախանշված երկարաժամկետ ծրագրերը բացակայում են, ինչը, բնականաբար, թուլացնում է վարվող տնտեսական քաղաքականության արդյունավետությունը, հետևաբար, եթե 2020 թվականին ցանկանում ենք գոնե նախորդ տարվա տնտեսական ակտիվության ցուցանիշը պահպանել, ապա պետք է ռազմավարական թիրախավորումները դնենք և հետևողական քայլերով փորձենք դրանք իրականացնել»,- նշեց նա:
Հակառակ պարագայում 2020 թ.-ին, ըստ Խաչատրյանի, թե՛ ԵԱՏՄ-ի միասնական դրույքաչափերի կիրառմամբ պայմանավորված որոշակի անկում ենք ունենալու, թե՛ առհասարակ օտարերկրյա ներդրումների ծավալն է կրճատվելու, ինչի մասին քիչ է խոսվում: Սա որոշակի ինդիկատոր է, որպեսզի կառավարությունը հասկանա՝ ինչ-որ բան այն չէ:
«Դուք մեզ արդեն մոռացել եք». «Նաիրիտի» աշխատողները կառավարության շենքի մոտ են
«Որքան էլ խոսում ենք, որ ներդրումային միջավայրը պետք է բարելավվի, ազատ մրցակցային պայմաններ լինեն, մոնոպոլիաների դեմ պայքար իրականացվի, այդուհանդերձ, արդեն երկու տարի է, ինչ օտարերկրյա ներդրումների ընդհանուր ծավալի էական փոփոխություն չունենք»,- ասաց տնտեսագետը:
Հայաստանում 300 մլրդ դրամ գտնվում է սառեցված վիճակում. Փաշինյան
Խաչատրյանի խոսքով՝ ոչ մի ներդրող ընդամենը կառավարության ինչ-որ պաշտոնյայի, թեկուզ վարչապետի հայտարարության հիման վրա որևէ ներդրում չի անում, հետևաբար, այստեղ շատ կարևոր են բիզնես միջավայրն ու դրանում եղած տրամադրությունները:
