ԵՐԵՎԱՆ, 23 դեկտեմբերի – Sputnik. «Դոն Պիպո» մականունով հայտնի գործարար Արթուր Ասատրյանին դատարանը թույլատրել է դուրս գալ Հայաստանի սահմաններից։ Տեղեկությունը «Հրապարակի» հետ զրույցում հայտնել է նրա պաշտպան Ռաֆայել Ամիրխանյանը։
Պարբերականի տեղեկություններով՝ Արթուր Ասատրյանը մեկնելու է Մոսկվա՝ բժշկական հետազոտություն անցնելու։
Ասատրյանը մեղադրվում է ՀՀ քրեական օրենսգրքի 131-րդ հոդվածի 1-ին, 2-րդ, 3-րդ և 6-րդ կետերով (մի խումբ անձանց կողմից նախնական համաձայնությամբ, առողջության համար վտանգավոր բռնություն գործադրելով, զենքի կամ որպես զենք օգտագործվող առարկաների գործադրմամբ, երեք անձի առևանգումը) և 235-րդ հոդվածի 2-րդ մասով (մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը):
Արթուր Ասատրյանը 2018 թվականի հունիսին կալանավորվել էր, սեպտեմբերին` ազատ արձակվել։
