ԵՐԵՎԱՆ, 23 դեկտեմբերի — Sputnik. Նոր տարվա օրերին Երևանը զբոսաշրջիկների թվով կարող է մրցակցել Վրաստանի մայրաքաղաքի հետ։ Sputnik Արմենիայի թղթակցի հետ զրույցում այս մասին ասաց Տուրիզմի հայկական ֆեդերացիայի նախագահ Մեխակ Ապրեսյանը։
Նրա խոսքով` արդեն մի քանի տարի է` Երևանը հանգամանորեն է պատրաստվում տոներին, և ամեն տարի զբոսաշրջային հոսքի աճ է նկատվում հատկապես Նոր տարվա օրերին։ Այս տարի և՛ Երևանը, և՛ Հայաստանի մյուս քաղաքները տոներին ավելի ջանասիրաբար են պատրաստվել, ինչը կարող է ավելի մեծ թվով զբոսաշրջիկների գրավել։
«Եթե զբոսաշրջիկները գոհ հեռանան, ապա հաջորդ տարի կարելի է զբոսաշրջային մեծ հոսք ակնկալել», – նշեց Ապրեսյանը։
Մանդարինի մեծածախ շուկա, կամ ինչպես են վրացին ու իրանցին Հայաստան բերում Ամանորի բույրը
Նա կարծում է, որ աստիճանաբար արդյունք են տալիս նաև մյուս երկրներում անցկացվող մարքեթինգային ակցիաները, դրանք անդրադառնում են զբոսաշրջային ցուցանիշների վրա, որոնք, որպես կանոն, տարեվերջին են ներկայացվում։ Այդ համատեքստում Ապրեսյանը նշեց ներքին զբոսաշրջության կարևորությունը, որի ցուցանիշները 2019 թվականի հունվար–սեպտեմբեր ամիսներին անցած տարվա նույն ժամանակահատվածի համեմատ աճել են 45,7%–ով։ Նրա համոզմամբ` Հայաստանի զբոսաշրջային վայրերը ավելի պահանջված են դարձել, զբոսաշրջային արդյունքը` ավելի դիվերսիֆիկացված։
«Եթե նախկինում ձմեռային զբոսաշրջության բոլորը սիրահարներն ընտրում էին Ջերմուկը, Ծաղկաձորը կամ Դիլիջանը, ապա այսօր կարող են գնալ Լեռնանիստ, Ճամբարակ կամ Կալավան։ Ցանկացած ճաշակի վայր կա», – եզրափակեց նա։
Նշենք, որ հունվար–սեպտեմբերի վիճակագրական տվյալներով` Հայաստան է այցելել 1 մլն 459 հազար մարդ (շուրջ 150 հազարով շատ, քան Հայաստանից մեկնածների թիվը), որոնք Զբոսաշրջության համաշխարհային կազմակերպության մեթոդաբանությամբ` զբոսաշրջիկ են համարվում։ Նրանց զգալի մասը արտերկրից գալիս է այցելելու հարազատներին կամ վերադառնում սեզոնային աշխատանքից։ Ներքին զբոսաշրջիկների թիվը կազմել է 1 մլն 405 հազար մարդ, սակայն այստեղ հաշվի են առնում նաև գործուղումները։ Այդուհանդերձ, առանձնացնում են նաև հանգստյան ուղևորությունները. այստեղ ևս աճ է նկատվում (707 հազարից մինչև 1 մլն 30 հազար)։ Այս ցուցանիշն աճել է 45,6%–ով։
Գրպանին ու տրամադրությանը համահունչ. ու՞ր մեկնել Ամանորին․ տոնական թոփ 5 ուղղություն
