ԵՐԵՎԱՆ, 21 դեկտեմբերի–Sputnik. ՀՀ երկրորդ նախագահ Ռոբերտ Քոչարյանի աջակից Վարուժան Մկրտչյանը ձերբակալվել է։ Քոչարյանի ենթադրյալ աջակցի կողմից Մարտի 1-ի գործով տուժողին ցուցմունքից հրաժարվելու առաջարկ անելու փաստով ոստիկանությունում հարուցված քրեական գործն ընդունվել է Հատուկ քննչական ծառայության (ՀՔԾ) քննիչի վարույթ։ Այս մասին Sputnik Արմենիայի հետ զրույցում տեղեկացրեց ՀՔԾ մամուլի քարտուղար Մարինա Օհանջանյանը։
Վարուժան Մկրտչյանը ձերբակալվել է ՀՀ Քրեական օրենսգրքի 340-րդ հոդվածի («սուտ ցուցմունք, կեղծ եզրակացություն տալու կամ սխալ թարգմանության համար կաշառելուն կամ հարկադրելուն, որոնք կատարվել են կազմակերպված խմբի կողմից») 4-րդ մասի 1-ին կետով նախատեսված հանցանքը կատարելու կասկածանքով։ Այս արարքի համար սահմանված է 3-ից մինչև 7 տարվա ազատազրկում:
Պլանավորած օպերացիա կամ «արջի ծառայություն». Քոչարյանի որդին մեկնաբանել է տեսանյութը
Հիշեցնենք, որ դեկտեմբերի 19-ին ՀՀ ոստիկանությունը տեսանյութ էր հրապարակել, որում հաղորդվում էր, որ Մարտի 1–ի իրադարձություններից տուժած անձին Քոչարյանի աջակիցը ցուցմունք չտալու առաջարկ է արել և դրա դիմաց գումար ու պաշտոն խոստացել։
«Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել Մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի»,–ասված էր ոստիկանության հաղորդագրության մեջ։
Դեպքի առթիվ ոստիկանությունում քրեական գործ էր հարուցվել։ Քրեական գործի շրջանակներում, ի թիվս այլ գործողությունների, կատարվել էին խուզարկություններ։
Հիշեցնենք նաև, որ այս առնչությամբ ՀՀ երկրորդ նախագահի որդին` Լևոն Քոչարյանը, Sputnik Արմենիային ասել էր, որ դա ընդամենը էժանագին մեմակաացում է։
«Դա բացարձակապես մեզ հետ կապ չունի, չի կարող ունենալ, մենք խնդիր չունենք որևէ ցուցմունք փոխելու։ Դրա մասին բազմիցս ենք ասել, նաև հայրս է հայտարարել դատարանում, սա աբսուրդ է. չափն ու սահմանը անցել են »,–ասել էր Լևոն Քոչարյանը։
«Մարտի 1-ի» գործի շրջանակում Հայաստանի երկրորդ նախագահ Ռոբերտ Քոչարյանին մեղադրանք է առաջադրվել 2018–ի հուլիսի 26-ին` ՀՀ քրեական օրենսգրքի 300.1-րդ հոդվածի 1-ին մասով` այլ անձանց հետ նախնական համաձայնությամբ Հայաստանի Հանրապետության սահմանադրական կարգը տապալելու համար:
