ԵՐԵՎԱՆ, 19 դեկտեմբերի — Sputnik. Sputnik Էստոնիայի լրագրողների հասցեին հնչեցրած սպառնալիքների պատճառով «Ռոսիա սեգոդնյա» ՄՏԳ-ի և RT հեռուստաալիքի գլխավոր խմբագիր Մարգարիտա Սիմոնյանը էստոներեն դիմել է Էստոնիայի նախագահ Կերստի Կալյուլայդին` կոչ անելով թույլ չտալ կալանավորել նրանց, գրում է ՌԻԱ Նովոստին։
«Հարգարժան տիկին նախագահ Կերստի Կալյուլայդ։ Չգիտեմ` տեղյա՞կ եք արդյոք, Ձեր երկրի ուժային կառույցների գործողություններից, որոնք քրեական հետապնդմամբ սպառնում են լրագրողներին` սեփական քաղաքացիներին, այն բանի համար, որ այդ մարդիկ պարզապես իրենց գործն են անում։ Նրանց վերջնագիր է ներկայացվել` ազատվել Sputnik–ում աշխատանքից մինչև հունվարի 1-ը կամ պատրաստվել բանտարկության», – գրել է Սիմոնյանն իր Telegram–ալիքում էստոներեն և ռուսերեն լեզուներով։
Sputnik Էստոնիայի աշխատակիցները Էստոնիայի ոստիկանության և սահմանային պահպանության դեպարտամենտի ղեկավարությունից ծանուցում նամակներ են ստացել, որ եթե մինչև գալիք տարվա հունվարի 1-ը չդադարեցնեն գլխամասային կազմակերպության` «Ռոսիա սեգոդնյա» միջազգային տեղեկատվական գործակալության հետ աշխատանքային հարաբերությունները, ապա նրանց հանդեպ քրեական գործեր կհարուցվեն։ Այդ գործողությունները հիմնավորվում են պատժամիջոցներով, որոնք ԵՄ–ն կիրառել է 2014 թվականի մարտի 17-ին մի քանի իրավաբանական և ֆիզիկական անձանց դեմ ուկրաինական իրադարձությունների ֆոնին։
Ինչո՞ւ Մարգարիտա Սիմոնյանը մայրական կապիտալ չի ստացել
«Անկեղծ ասած, դժվարությամբ եմ պատկերացնում, որ Էստոնիայում խախտելով բոլոր հնարավոր իրավունքներն ու ազատությունները, պատրաստ են բանտ ուղարկել 30 լրագրողի։ Սակայն, ես` որպես «Ռոսիա սեգոդնյայի» գլխավոր խմբագիր, պարտավորված եմ այդ սպառնալիքին լուրջ վերաբերվել. Ուկրաինայում իր մասնագիտության համար 400 օր բանտում անցկացրեց մեր գործընկեր Կիրիլ Վիշինսկին», – գրել է Սիմոնյանը` կոչ անելով Էստոնիայի նախագահին թույլ չտալ կալանավորել Sputnik–ի լրագրողներին։
«Գիտեմ, որ մեր երկրների հարաբերությունները կարող են ավելի լավը լինել։ Մենք տեղյակ ենք հանգիստ երկխոսության վերաբերյալ Ձեր պատրաստակամության մասին , ինչի համար և գնահատում ենք Ձեզ։ Մենք, ինչպես և Դուք, չենք ցանկանում, որպեսզի Էստոնիայի համար ամաչելու տեղիք լինի։ Եկեք միասին դա թույլ չտանք», – նշված է հաղորդագրության մեջ։
Ավելի վաղ «Ռոսիա սեգոդնյա» ՄՏԳ–ում հայտարարել էին, որ գործակալությունը Էստոնիայի իշխանության գործողությունները գնահատում է որպես կոպիտ կամայականություն և մտադիր է դիմել ՄԱԿ, ԵԱՀԿ, Եվրոպայի խորհուրդ, ՅՈՒՆԵՍԿՕ և ՄԻԵԴ և պահանջել գնահատական տալ խոսքի ազատությունը ոտնահարելու վերջին տարիների ընթացքում այս աննախադեպ դեպքին և միջոցներ ձեռնարկել լրագրողների` սեփական մասնագիտական գործունեությունը ծավալելուն ուղղված իրավունքները պաշտպանելու համար։
Ավելի վաղ Մարգարիտա Սիմոնյանն իր Telegram–ալիքում գրել էր. «Այ քեզ բան։ Էստոնիայում պաշտոնապես սպառնում են ազատազրկել մեր լրագրողներին, եթե նրանք մինչև Ամանոր աշխատանքից չազատվեն։ Եթե այդ երկրի իշխանությունը ետ չկանգնի իր որոշումից, ապա ԵԱՀԿ, ՄԻԵԴ, էլ ով կա այնտեղ` Եվրոպաներում, խոսքի ազատության համար պատասխան տվող, խորհուրդ եմ տալիս ինքնալուծարվել»։
