ԵՐԵՎԱՆ, 19 դեկտեմբերի — Sputnik. ՀՀ վարչապետը Նիկոլ Փաշինյանը կառավարության նիստի մեկնարկին հայտարարեց, որ երեկ Քննչական կոմիտեի` երեխաների թրաֆիքինգի մասին հայտարարությունից հետո շոկի մեջ է։
«Այդ ժամանակ մարդկայնորեն չէի կարող հավատալ, որ այս թեմայով կլինեն բացահայտումներ, բայց փաստը մնում է փաստ, որ մենք ունենք ձերբակալվածներ»,–ասաց Փաշինյանը։
Չխախտելով անմեղության կանխավարկածը, վարչապետը հիշեցրեց, որ քրեական գործով կան առնվազն կասկածներ, որոնք թույլ են տալիս որոշ մեկնաբանություններ անել։
ՔԿ նախագահ Հայկ Գրիգորյանն էլ զեկուցեց, որ քրեական գործով ձերբակալվածներն այս պահին արդեն 5-ն են։
«Ապացույցների համակցությունն այս պահին բավարար է նրանց Քրեական օրենսգրքի 168 հոդվածով մեղադրանք առաջադրելու համար, որի դիսպոզիցիան հնչում է հետևյալ կերպ` երեխային ծնողներից առանձնացնելը»,– ասաց ՔԿ նախագահը։
Երկու երեխայի վաճառք կազմակերպելու կասկածանքով ձերբակալված կա. ՔԿ
Գրիգորյանը նաև հայտնեց, որ քրեական գործի նախաքննության շրջանակում առգրավվել են ձերբակալված անձանց պաշտոնավարումից` 2012-ից առ այսօր եղած բոլոր փաստաթղթերը, որոնցով կատարվելու է մանրակրկիտ քննություն։
«Ունենք մի շարք անձանց ուղղակի ցուցմունքներ, որոնք մերկացնում են մեղադրվողներին այդ արարքի մեջ»,– հայտնեց Գրիգորյանը։
Գյումրու աղբանոցում գտնված երեխայի մորը մեղադրանք է առաջադրվել սպանության հատկանիշներով
ՀՀ վարչապետ Նիկոլ Փաշինյանը կարևորեց, որ գործի քննությունն իրականացվի ամբողջական, առանց էմոցիաների։
«Կարևոր է հասկանալ, թե ՀՀ–ում ինչպես է գոյություն ունեցել ու տարիներով գործել հանցավոր մեխանիզմը»,– ասաց Փաշինյանը։
Հիշեցնենք, որ ծնողներից երեխային ապօրինի բաժանելու կասկածանքով երեկ ձերբակալվեցին «Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտ» ՓԲ ընկերության տնօրեն Ռազմիկ Աբրահամյանը, փոխտնօրեն Արշակ Ջերջերյանը, «Երևանի մանկան տուն» ՊՈԱԿ-ի տնօրեն Լիանա Կարապետյանը:
