Պետությունը նախկինում իր պարտավորությունները չէր կատարում, այժմ կատարում է, այսինքն` հարկերի գերավճարների գծով 275 միլիարդ դրամի պարտքն այդքան չպետք է մնար ու կուտակվեր: Sputnik Արմենիայի հետ զրույցում ասաց տնտեսագետ Արմեն Քթոյանը։
«Եթե բիզնեսին պարտք ես այդքան գումար և չես վերադարձնում, բիզնեսը կա՛մ պետք է այդ մասով արտադրություն չիրականացնի, կա՛մ էլ դրա փոխարեն մտածի, թե որտեղից միջոցներ հայթայթի (վարկերի տեսքով, պարտատոմսերի թողարկման տեսքով և այլն): Իսկ եթե բիզնեսին վերադարձնում ես նրա փողերը, ապա դա անկասկած աշխուժություն կմտցնի տնտեսվարողների գործունեության մեջ: Նրանք, օրինակ, հումք կգնեն, նոր սարքավորումներ ձեռք կբերեն, եղած հզորությունները կգործարկեն, ինովացիոն լուծումներ կկիրառեն: Բիզնեսը 180 միլիարդ դրամի չափով կսկսի իրականացնել տնտեսական գործունեություն, ինչը որ պետք է աներ նախկինում»,- նշում է Արմեն Քթոյանը:
Հայկական հեղափոխությունը կհասնի կովերին ու լոլիկներին. գյուղացին պետք է իմանա իր պլանները
Տնտեսագետի կարծիքով՝ բիզնեսը, նախկինում ձևավորված խաղի կանոնների համաձայն, այլընտրանք չուներ: Պետությունն առաջարկում էր շատ հարկեր վճարել՝ վերադարձնելու պայմանով, իսկ գործարարները պարզապես չէին կարող չվճարել՝ նույնիսկ իմանալով հանդերձ, որ այդ գումարները հետ չեն գալու:
Ներկայիս կառավարության գործելակերպը, Քթոյանի դիտարկմամբ նորմալ երևույթ է, բայց քանի որ մեզ մոտ նախկինում ձևախեղված է եղել ու հիմա, երբ փորձ է արվում գործընթացը բերել բնականոն դաշտ, դա ինչ-որ արտառոց բան է թվում, մինչդեռ բիզնես ոլորտում ընդամենը փորձ է արվում հաստատել խաղի բնականոն պայմաններ:
2018 թվականի հունվարի 1-ի դրությամբ կառավարությունը հարկերի գերավճարների գծով տնտեսվարողներին պարտք է եղել 275 միլիարդ դրամ: 2019 թվականի դեկտեմբերի 1-ի դրությամբ նմանօրինակ պարտքը կազմում է 95 միլիարդ դրամ` ներառյալ նաև ԱԱՀ-ի ընթացիկ պարտքերը և դեբետները:
