ԵՐԵՎԱՆ, 4 դեկտեմբերի — Sputnik. Հայաստանի խորհրդարանի դիմաց այս պահին բողոքի ակցիա է ընթանում։ Դեկտեմբերի 2–ին Արցախում մահացած զինծառայողի հարազատներն են եկել ԱԺ շենքի դիմաց և պահանջում են արդարադատություն` նշելով, որ իրենց տղային սպանել են։
Հիշեցնենք` դեկտեմբերի 2-ին՝ ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը։ Զինծառայող, 1999թ. ծնված Դավիթ Հարությունի Մելիքբեկյանը վիրավորվել է։
Բողոքի ակցիայի մասնակիցներին մոտեցավ ԱԺ պաշտպանության և անվտանգության մշտական հանձնաժողովի նախագահ Անդրանիկ Քոչարյանը։ Զոհված զինծառայողի վրդովված հարազատներին Քոչարյանը վստահեցրեց, որ իրենց հանձնաժողովը ճշմարտության բացահայտման համար ամեն ինչ անելու է։
«Սա ամենաահավոր բանն է, որ կարող է բանակում տեղի ունենալ։ Սրանք տարիների կուտակված դրսևորումներն են, բանակում պետք է արմատախիլ արվեն այն երևույթները, որոնք հանգեցնում են նման իրավիճակների»,–ասաց նա։
Զինվորը հենակետում պետք է զգա կառավարության, ժողովրդի, hայրենիքի ներկայությունը. Փաշինյան
Արթուր Աջամյանի հորեղբայրը` Ջամալ Աջամյանը, շարունակում էր պնդել, որ եթե հետաքննություն է գնում, ինչու են ինքնասպանության պիտակ կպցնում մեր զինծառայողին։ «Եղել է սպանություն, կա երրորդ մարդ։ Ուզում ենք վիրավորին տեսնել»,–ասում էր նա։
Մահացած զինծառայողի մայրը լրագրողների հետ զրույցում արցունքախառն աչքերով պահանջում էր, որ գտնեն ու բերեն իր տղային սպանողին։ «Ես ուզում եմ իմանամ` ինչի են իմ երեխուն սպանել»,–գոռում էր նա։
Հիշեցնենք, որ ՀՀ քննչական կոմիտեում դեկտեմբերի 2–ի դեպքի հետ կապված ՀՀ քրեական օրենսգրքի 104-րդ հոդվածի 2-րդ մասի 1-ին կետով (Սպանություն) քրեական գործ է հարուցվել։
