ԵՐԵՎԱՆ, 4 դեկտեմբերի — Sputnik. Քաղաքապետը թող պատկերացնի, որ քաղաքապետարանը թատրոնի շենք չէ ու աշխատի կատարել երևանցիներին տված իր նախընտրական խոստումները։ Այսօր Ազգային ժողովում լրագրողների հետ զրույցում այս մասին ասաց ԱԺ «Բարգավաճ Հայաստան» խմբակցության ղեկավար Գագիկ Ծառուկյանը` անդրադառնալով երեկ Երևանի քաղաքապետ Հայկ Մարությանի հարցազրույցին, որտեղ վերջինս նշում էր, թե Երևանի կենտրոնում Ծառուկյանը հյուրանոց չի կարողանում կառուցել, քանի որ կա դատարանի որոշում, ինչի հետ քաղաքապետարանը ոչ մի կապ չունի:
«Ոչ թե Ծառուկյանը չի տիրապետում ինֆորմացիային, այլ քաղաքապետը,- ասաց նա և ի հավաստումն ասվածի` լրագրողներին ցույց տվեց իր հետ բերած փաստաթուղթը,–խնդրեմ` Մարությանի ստորագրությամբ, ժամկետով` 18.04.2019թ. «Կեմպինսկի» հյուրանոցի շինթույլտվություն, 9-րդ կետ, որ թույլտվությունը տրված է 11 հարկի և հետին մասը` շարունակելի»։
Անդրադառնալով Աբու Դաբիի թագաժառանգի` Հայաստան այցելել–չայցելելու շուրջ քաղաքապետարանի հետ ծավալված հեռակա բանավեճին, Ծառուկյանը խորհուրդ տվեց «դատարկ–դատարկ» չխոսել, այլ նայել օդանավակայանի գրանցամատյանները։
«2019թ.–ի ապրիլի 26-ին շեյխն իր ինքնաթիռով, 18 հոգով եկել են Հայաստան։ Այս վերաբերմունքն արդեն վրդովմունք է առաջացրել մեր գործընկերների մոտ։ Այս ձևով վերաբերվել չի կարելի, հարկավոր է հարգալից լինել»,– ասաց Ծառուկյանը։
Հիշեցնենք` Երևանի քաղաքապետ Հայկ Մարությանի և ԲՀԿ առաջնորդ Գագիկ Ծառուկյանի միջև հակասություններն ի հայտ եկան այն ժամանակ, երբ Ծառուկյանն Ազգային ժողովում հայտարարեց, թե Հայաստանում խոշոր ներդրումներ կատարելու ցանկություն ունեցող Աբու Դաբիի թագաժառանգը Հայկ Մարությանի հետ հանդիպումից հետո հիասթափված հեռացել է Հայաստանից:
Քաղաքապետի մամուլի խոսնակը հերքեց Ծառուկյանի այդ հայտարարությունը։ Ծառուկյանն էլ ի պատասխան հեռուստաընկերությամբ եթեր հեռարձակեց տեսանյութ, որտեղ Քուվեյթի թագաժառանգի ներկայացուցիչները որոշ փակագծեր բացեցին քաղաքապետի ու Երևանի գլխավոր ճարտարապետի հետ հանդիպումից։
«Մտերիմներիցս մեկն ինձ ասաց՝ աղջիկ ջան, ուշքի արի...». անկեղծ զրույց Նաիրա Զոհրաբյանի հետ
Ներդրողն առաջարկել էր Երևանի կենտրոնում կառուցել բարեգործական հիվանդանոց և հյուրանոց: Մարությանն էլ մերժել էր` ասելով, թե քաղաքապետարանը չի կարող համապատասխան տարածք տրամադրել Կենտրոն վարչական շրջանում: Մարությանը հայտարարել էր, որ հիվանդանոցի բարեգործական լինելու մասին խոսք չի եղել։
Ինչ վերաբերում է Գագիկ Ծառուկյանի մեկ այլ հայտարարությանը, թե քաղաքապետարանը խոչընդոտներ է ստեղծում Աբովյան 5 հասցեում նախատեսվող հյուրանոցի կառուցման համար, ապա Մարությանն ասել էր՝ խոչընդոտներ չկան, կառուցումը կասեցվել է հյուրանոցի հարևանությամբ գտնվող այլ կառույցի սեփականատիրոջ` դատարան դիմելու պատճառով, քաղաքապետարանն այդ կասեցման հետ որևէ կապ չունի. դատարանն է կասեցրել։
