ԵՐԵՎԱՆ, 4 դեկտեմբերի — Sputnik. ՀՀ երրորդ նախագահ Սերժ Սարգսյանը չի ընդունում իրեն առաջադրված մեղադրանքը։ Tert.am–ի հետ զրույցում այս մասին ասել է Սարգսյանի պաշտպան Ամրամ Մակինյանը։
Ավելի վաղ հայտնել էինք, որ Սերժ Սարգսյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով` յուրացնելու կամ վատնելու համար։
«Սերժ Սարգսյանն ունի շատ հիմնավոր կարծիք, որ իր նկատմամբ քաղաքական հետապնդում է իրականացվում։ Սարգսյանի համար կանխատեսելի էր, որ քրեական հետապնդման փորձեր կլինեն իր հանդեպ, և սա տրամաբանական ավարտ էր։ Սերժ Սարգսյանը մտահոգված է առհասարակ քրեական դատավարական պրոցեսներով»,– ասաց Մակինյանը։
Նա պատմեց նաև, որ ՀՔԾ–ն Սերժ Սարգսյանին դեկտեմբերի 4–ին, ժամը 13։30-ին որպես վկա հարցաքննության կանչելու ծանուցագիր էր ուղարկել նոյեմբերի 29–ին: Սակայն, երբ Սարգսյանը ներկայացել է հարցաքննության, քննիչն այդ ժամանակ տեղեկացրել է նրան, որ որպես կասկածյալ են նրան հարցաքննելու:
Փաստաբանի խոսքով` իրենք նույն պահին առարկություն են ներկայացրել, որ նախագահն օժտված է անձեռնմխելիությամբ, սակայն դա ոչինչ չի փոխել վարույթն իրականացնող մարմնի գործողություններում, և շարունակվել է հարցաքննությունը կասկածյալի կարգավիճակում:
«Հարցաքննությունից հետո տեղի ունեցավ առերեսում, որն ավարտեց 16։10–ին։ Իսկ 16։12 րոպեին քննիչը սեղանի վրայից շրջեց փաստաթղթեր, որտեղ նշված էր Սարգսյանին որպես մեղադրյալ ներգրավելու մասին որոշումը։ Կախարդանքի շնորհիվ 6 էջ որոշումը քննիչը կարողացավ երկու րոպեում կազմել, տպել, ներկայացնել»,–ասաց փաստաբանը` հավելելով, որ սա փաստում է այն մասին, որ Սարգսյանի հարցաքննությունը ՀՔԾ–ի համար կոպեկի արժեք չուներ. որոշումն արդեն ընդունված էր։
Մակինյանը, սակայն, չհայտնեց, թե ում հետ է առերեսում կատարվել հարցաքննության ժամանակ։ Բայց այդ մարդը, ըստ նրա, շատ շփոթված ու հուզված է եղել։
Մակինյանը հայտնեց նաև, որ Սարգսյանի` որպես մեղադրյալ ներգրավելու ու խափանման միջոց ընտրելու հարցի առնչությամբ գլխավոր դատախազին բողոք են ներկայացնելու։
Սերժ Սարգսյանը վատ ղեկավար է եղել, վատ ընկեր, ինձնից գործարան է խլել. Խաչատուր Սուքիասյան
Հիշեցնենք, որ ըստ ՀՔԾ–ի` ՀՀ նախկին նախագահ Սերժ Սարգսյանի կազմակերպմամբ` պաշտոնատար մի խումբ անձանց կողմից պետությունից վատնելու եղանակով հափշտակվել է ընդհանուր առմամբ 489.160.310 ՀՀ դրամ։
Սարգսյանի նկատմամբ խափանման միջոց է ընտրվել չհեռանալու մասին ստորագրությունը: Քրեական գործով նախաքննությունը շարունակվում է:
