ԵՐԵՎԱՆ, 3 դեկտեմբերի — Sputnik. Տոկիո– 2020 օլիմպիական խաղերի մարմնամարզության մրցումներում Հայաստանի հավաքականը կունենա մեկ մասնակից՝ Արթուր Դավթյանը: Մենք կարող էինք ունենալ ևս մեկ մասնակից, բայց վարկանիշային մրցումների անցկացումը Բաքվում` զրկում է մեր մարմնամարզիկներին նման հնարավորությունից: Լրագրողների հետ զրույցում այս մասին ասաց մարմնամարզության Հայաստանի հավաքականի գլխավոր մարզիչ Հակոբ Սերոբյանը։
«Մենք կարող էինք, անկասկած, վարկանիշ վաստակել նաև օղակների վարժություններում, որտեղ ունենք միան քանի մարզիկներ՝ Վահագն Դավթյանը, Աթուր Ավետիսյանը: Բայց, քանի որ վարկանիշային առաջիկա երեք մրցաշարերից միայն մեկին ենք մասնակցելու , դա արդեն անհնարին է դառնալու: Բաքվում, Մելբուռնում և Դոհայում կայանալիք մրցումներից մենք կմասնակցենք միայն Դոհայի մրցաշարին: Պարզ է, որ Բաքու չենք մեկնելու, ու դրանից հետո արդեն իմաստ էլ չկա մտածել Մելբուռնի մասին»- ասաց Հակոբ Սերոբյանը:
Ընդհանուր առմամբ, Հայաստանի հավաքականի մարզիչը գոհ է 2019 թվականին կայացած մրցաշարերում հայ մարմնամարզիկների ելույթներից:
Գյումրիում չեմպիոն դառնալը գրիպի վարակի պես է. գյումրեցիները դիմավորեցին «մեղավորներին»
«Կարևորն այն է, որ մենք ունենանք երիտասարդ մարմնամարզիկներ, որոնք իրենց ծրագրերով արդեն շատ մոտ են համաշխարհային բարձր մակարդակին: Ես շատ սպասելիքներ ունեմ մեր երիտասարդներից ու հուսով եմ, որ առաջիկա տարիների ընթացքում մենք նոր ու բարձր արդյունքներ կգրանցենք»- հավելեց Հակոբ Սերոբյանը:
Նա նշեց, որ հայ մարմնամարզիկներն արդեն երկար ժամանակ է, ինչ միջազգային տարբեր մրցումներում հավակնում են բարձր տեղերի ու նվաճում տարբեր հարգի մեդալներ:
2019 թվականը մարմնամարզությունում կարևոր տարի էր օլիմպիական վարկանիշ վաստակելու համար: 2016-ի օլիմպիական խաղերում երկու մասնակից ունենալով (Հարություն Մերդինյան, Արթուր Դավթյան), հույսեր կային, որ մենք 2020 թվականին էլ օլիմպիական խաղերում կունենանք առնվազն այդքան մասնակից:
Սակայն տարվա արդյունքների ամփոփումով արդեն պարզ է, որ մարմնամարզության օլիմպիական մրցաշարին մասնակցելու է միայն Արթուր Դավթյանը, որը վարկանիշը վաստակել է բազմամարտի մրցումներում, բայց կմասնակցի հենացատկի մրցաշարին միայն:
