Արտյոմ Տոնոյանի խոսքով՝ խորհրդարանական արտահերթ ընտրությունների քննարկումն Ադրբեջանում կար շատ վաղուց: Մեկ տարի առաջ ադրբեջանական մամուլում նման թեմայով եղան հրապարակումներ: Արտահերթ ընտրությունների պատճառ կարող է լինել սինխրոնիզացիան՝ կապված նախագահական և խորհրդարանական ընտրությունների ժամկետների հետ:
«Եթե հիմա անցկացվեն արտահերթ ընտրություններ, ապա 2025 թվականին կլինեն և՛ խորհրդարանական, և՛ նախագահական ընտրություններ, իսկ Ադրբեջանի պես տոտալիտար երկրում ընտրությունները հղի են տարաբնույթ զարգացումներով։ Նրանք փորձում են ներքաղաքական կյանքի համար էական այդ ընտրական գործընթացը ժամկետների առումով բերել համընկնման, այսինքն` անցկացնել միաժամանակ և ազատվել բոլոր խնդիրներից»- նշում է Արտյոմ Տոնոյանը:
Երկրորդ պատճառն, ըստ փորձագետի, այն է, որ ընդդիմությանը նույնպես ձեռնտու է այս տարբերակը, բայցևայնպես ընդդիմության ճակատում իրավիճակը դեռ խիստ անբարենպաստ է: Երբ 2018 թվականին տեղի ունեցան ցույցեր, կարծում էին, որ գործընթացը կունենա զարգացում, կլինեին արտահերթ ընտրություններ, սակայն նման բան տեղի չունեցավ, և ներքաղաքական լարվածությունը մարեց:
ԵԱՀԿ առաքելությունը դիտարկում կանցկացնի Արցախի և Ադրբեջանի սահմանին
Արտյոմ Տոնոյանի դիտարկմամբ՝ դրանից հետո ադրբեջանական մամուլում և հանրության լայն շերտերում սկսեցին քննադատել ոչ այնքան իշխանություններին, որքան ընդդիմությանը: Նույնիսկ խոսում էին ստվերային պայմանավորվածությունների մասին: Ադրբեջանում բոլոր ընդդիմադիր ուժերն այժմ պառակտված են ու հեղինակազրկված:
