ԵՐԵՎԱՆ, 2 դեկտեմբերի – Sputnik. Գործարար Խաչատուր Սուքիասյանը հարգում է բոլոր նախկին պաշտոնյաներին, բայց համարում է, որ ՀՀ երրորդ նախագահ Սերժ Սարգսյանը վատ ղեկավար է եղել։ Նա այս մասին ասաց այսօր լրագրողների հետ զրույցում` մեկնաբանելով ՀՀ երրորդ նախագահ Սերժ Սարգսյանի` վերջերս հնչեցրած հայտարարությանը։
Սարգսյանը Եվրոպական ժողովրդական կուսակցություն համագումարում հայտարարել էր, թե նոր իշխանությունն իրականում վերջին մեկուկես տարվա ընթացքում որևէ հեղափոխական փոփոխություն կամ երկրի արտաքին ու ներքին օրակարգերի հեղափոխական բեկում չի մտցրել։
Քննադատում է այն, ինչն իր համար է ստեղծել. ԱԺ-ում խոսել են Սերժ Սարգսյանի ելույթի մասին
«Սերժ Սարգսյանն էլ է դրական գործել, քանի որ ունեցել ենք Սահմանադրություն, ինչ-որ սահմաններ պահել է: Բայց Սերժ Սարգսյանը շատ վատ ղեկավար է եղել, նա ամեն ինչ արել է իր և իր փեսայի համար»,– ասաց գործարարը:
Սուքիասյանն անդրադարձավ նաև երրորդ նախագահի հետ հարաբերություններին։
«Եթե Սերժ Սարգսյանն ինձանից գործարան է խլել, ես չեմ կարող նրա հետ լավ հարաբերություններ ունենալ»,– նշեց գործարարը:
Սուքիասյանը շեշտեց, որ Սերժ Սարգսյանը ոչ միայն շատ վատ ղեկավար է եղել, այլև շատ վատ ընկեր։
«Երբ երկիրը կառուցվում էր, ու նա Ղարաբաղից եկավ, ես հիշում եմ նրան Նա իր բոլոր հին ընկերներին մոռացավ: Մինչև անգամ մոռացավ նրան, ումից ընդունեց նախագահությունը: Խաբելը շատ վատ բան է: Եթե մարդը կարող է առաջին դեմքի մակարդակով սուտ խոսել, կործանված է և՛ այդ մարդը, և՛ այն միջավայրը, որտեղ նա ապրում է»:
Հիշեցնենք` «Բջնի» հանքային ջրերի գործարանը, որը պատկանում էր Սուքիասյանների ընտանիքի «ՍԻԼ» կոնցեռնին, 2008 թ–ի նախագահական ընտրությունից հետո փակվեց հարկային պարտավորությունների կատարման թերացման համար։ 2009 թ–ին գործարանը գնեց մեկ այլ գործարար` Ազգային ժողովի պատգամավոր Ռուբեն Հայրապետյանը («Նեմեց Ռուբո»)։
