ԵՐԵՎԱՆ, 1 նոյեմբերի — Sputnik, Նելլի Դանիելյան. Անձնագրային գրասենյակներում կոռուպցիոն երևույթները կանխելու ամենաարդյունավետ միջոցը սոցիալական կայքերն են։ Այս մասին Sputnik Արմենիայի հետ զրույցում հայտնեց ՀՀ ոստիկանության անձնագրային և վիզաների վարչության պետ, ոստիկանության գնդապետ Մնացական Բիչախչյանը` նշելով, որ ֆեյսբուքյան իր էջը բաց է բոլոր քաղաքացիների ահազանգերի համար, ինքն էլ անարձագանք չի թողնում դրանցից ոչ մեկը։
«Հանրային ծառայությունների բնագավառում ամենաառաջին գերխնդիրը կոռուպցիայի դեմ պայքարն է։ Որովհետև եթե անմիջապես շփվում ես քաղաքացու հետ, միանգամից շատ արագ ազդակները ստանում ես` որտեղ ինչ խնդիրներ կան։ Իհարկե, եղել են խնդիրներ, որոնք շատ արագ շտկվել են, եղել են խնդիրներ, որոնց հիման վրա նշանակվել են ծառայողական քննություններ, եղել են դեպքեր, երբ աշխատակիցներ են հեռացվել աշխատանքից` նրանց վատ վերաբերմունքի մասին քաղաքացիների ֆեսյբուքյան գրառումից հետո»,– ասաց Բիչախչյանը։
Այդուհանդերձ, համակարգում անելիքներ դեռ շատ կան, քաղաքացիների նամակներն էլ չեն դադարում։ Բիչախչյանն արձանագրում է, որ իր ղեկավարած ոլորտն իդեալական վիճակում չէ։
Քաղաքացիների ահազանգերից շատերը վերաբերում են անձնագրային բաժիններում իրենցից տարբեր պատճառաբանություններով առձեռն վճարումներ պահանջելուն։ Վարչության պետը հորդորում է անձնագրայինի որևէ աշխատակցի առձեռն գումար չտալ ու այդ մասին շտապ հայտնել իրեն։
«Եթե սահմանված է, որ անձնագրային մարմնի հետ հարաբերակցվելիս պետք է ներկայացնել վճարման անդորրագիր, ուրեմն վերջ։ Կանխիկ գումարով գործառույթ կատարելու իրավասություն վերապահված է միայն սահմանային անցման կետերում, որտեղ չկան վճարային տերմինալներ, աշխատակցին տալիս են գումար, աշխատակիցը տանում, վճարումը կատարում է։ Անձնագրային բոլոր ծառայություններում մենք ունենք վճարային տերմինալներ, և քաղաքացին կա՛մ տերմինալով պետք է վճարի, կա՛մ բանկով։ Ոչ մի տեսակի կանխիկ գումար չպիտի տրամադրվի աշխատողին, անգամ եթե դա լինի 100 դրամ»,– ասաց նա։
Իսկ աշխատակիցների նման գործողությունները Բիչախչյանը դիտարկում է որպես ծառայողական խախտում և նշանակում ծառայողական քննություն։
Ի դեպ, առաջիկայում անձնագրային բաժիններում տեղադրվելու են նաև մանրադրամներ վերադարձնող սարքավորումներ։ Համապատասխան որոշումն արդեն ընդունվել է ՀՀ կառավարությունում։ Բիչախչյանը դա ևս համարում է կոռուպցիայի դեմ պայքար։
Ինչ անել փաստաթղթերի պատճառով խնդրի առաջ չկանգնելու համար. մանրամասնում է ոլորտի ղեկավարը
«Եթե սահմանված է, որ անձնագրային մարմնին պետք է ներկայացնել վճարման անդորրագիր, այսքանով ամեն ինչ ասված է։
«Այժմ, երբ քաղաքացու մանրը տերմինալը չի վերադարձնում, քաղաքացու մոտ թյուրըմբռնում է տեղի ունենում, որ անձնագրայինի աշխատակիցը մանրը չվերադարձրեց»,– ասաց Բիչախչյանը։
Բացի այդ, նոր կազմակերպությունը, Բիչախչյանի խոսքով, հրաժարվել է ներկայում գործող 200-300 դրամ միջնորդավճարից։ Այսինքն` անձնագրային ծառայությունների դիմաց քաղաքացիների վճարումներն առաջիկայում այդ չափով կնվազեն։
Միաժամանակ ՀՀ–ի 35 առավել ծանրաբեռնված անձնագրային ծառայություններում առաջիկայում նախատեսվում է տեղադրել նաև հերթագրման համակարգեր։ Համապատասխան պայմանագիրը մասնավոր ընկերության հետ 6 տարի սպասարկման ժամկետով արդեն կնքվել է, ընդ որում` առանց պետության կողմից լրացուցիչ ծախսի։
«Էլեկտրոնային հերթագրման համակարգի տեղագրումը շատ կարևոր հանգամանք է, այնպես, ինչպես տեղադրված է բանկերում, սպասարկման այլ ծառայություններում։ Եվ սա նույնպես նպաստում է ինչպես կոռուպցիայի դեմ պայքարին, այնպես էլ առավել քաղաքակիրթ սպասարկմանը։ Եթե քաղաքացին գիտի, որ իրենից առաջ հերթի մեջ նույնիսկ 20-30 հոգի կա, բայց գործում է արդարության սկզբունքը, իրենից առաջ այլ մարդիկ չեն խցկվելու, ինքը 2-3 ժամ կսպասի առանց որևէ խնդրի։ Մենք չենք ունենա կոնֆլիկտ, և՛ քաղաքացին գոհ կմնա անձնագրային ծառայությունից, և՛ իմ աշխատակիցը օրվա ավարտին հանգիստ կգնա տուն»։
Բիչախչյանի խոսքով` համակարգի ներդրման շուրջ պայմանագիրն արդեն ստորագրման փուլում է, և դրա ստորագրումից հետո 5 ամիս անց համակարգն արդեն կսկսի գործել։
Բիչախչյան. «Միգրացիոն հոսքերը կառավարելու համար պետք չէ առանձնացնել ըստ ազգությունների»
