Շուտով օրենքի նախագիծ է դրվելու շրջանառության մեջ, ըստ որի՝ նույնականացման քարտը համարվելու է ճամփորդական փաստատուղթ: Sputnik Արմենիայի հետ զրույցում այս մասին ասաց ՀՀ ոստիկանության անձնագրային և վիզաների վարչության պետ Մնացական Բիչախչյանը։
Բիչախչյանի կարծիքով՝ դրա վառ վկայությունն է կառավարության վերջին նիստերից մեկում հավանության արժանացած` Հայաստանի և Ղազախստանի կառավարությունների միջև կնքվելիք համաձայնագրի նախագիծը, որով կարգավորվում է երկու երկրների քաղաքացիների փոխայցերին առնչվող հարցը:
«Մեր ներպետական օրենսդրությամբ պետք է իրավական հնարավորություն ստեղծենք, որպեսզի հետագայում դրա հիման վրա մեր քաղաքացիները կարողանան նույնականացման քարտով ազատ ու անխոչընդոտ ճամփորդել դեպի Ղազախստան: Այլ երկրների խնդիրը կարգավորվելու է միջազգային պայմանագրերով»,- նշում է ՀՀ ոստիկանության անձնագրային և վիզաների վարչության պետը:
Ղազախստան այցելող ՀՀ քաղաքացիներն այլևս հաշվառվելու պարտավորություն չեն ունենա
Նրա համոզմամբ՝ մոտ ապագայում Հայաստանը նման ընթացակարգ կունենա շատ այլ երկրների հետ:
ID քարտի առավելությունները թվարկելիս ոստիկանության պաշտոնյան նշում է, որ նույնականացման քարտն ավելի հեշտ կրվող փաստաթուղթ է, ուշ է մաշվում, նրա վրա կա հանրային ծառայությունների համարանիշ, այն իր մեջ պարունակում է էլեկտրոնային պահոց՝ ընձեռելով էլեկտրոնային ստորագրությամբ գործարքներ կատարելու հնարավորություն, հետևաբար, նույնականացման քարտն ավելի շահեկան փաստաթուղթ է, քան սովորական կամ բիոմետրիկ անձնագիրն ու խնամքով պահելու դեպքում հնարավոր է ավելի քան տասը տարի օգտագործել:
