ԵՐԵՎԱՆ, 30 նոյեմբերի – Sputnik. «Միսս տիեզերք Արմենիա 2019» տիտղոսակիր Դայանա Դավթյանն արդեն Ամերիկայի Միացյալ Նահանգների Ատլանտա քաղաքում է, որտեղ դեկտեմբերի 8-ին կկայանա «Միսս տիեզերք 2019» գեղեցկության մրցույթը: Sputnik Արմենիան Դայանայի հետ զրուցել է սպասումների, ապրումների, բնական գեղեցկության ու մեծ երազանքների մասին:
«Իմ ուժերի ներածին չափով պատրաստվել եմ մրցույթին։ Այժմ էլ շատ բարձր տրամադրություն ունեմ և հպարտ եմ, որ հենց ես եմ ներկայացնելու Հայաստանը։ Մինչև մեկնելս արդեն հասցրել էի սոցցանցերով ծանոթանալ ու շփվել մրցույթին մասնակցող աղջիկների հետ»,- ասաց Դայանան։
Գեղեցկուհին պատմեց, որ աղջիկներն իրեն սիրով են դիմավորելու, չնայած կարճ ժամանակահատվածին` հասցրել են ընկերանալ։
Նշենք, որ Դայանան երկու ամիս ակտիվ հաճախում էր մարզասրահ, անգլերենի գիտելիքներն էր խորացնում։ Ճիշտ է` անգլերենին տիրապետում է, բայց ոչ այնքան լավ, որքան ռուսերենին և հայերենին, ուստի դեռ չգիտի` ժյուրիի հետ հարցազրույցի փուլում կօգտվի թարգմանչի ծառայությունից, թե ոչ։
«Գաղափար չունեմ, թե ժյուրին ինձ համար ինչ հարցեր է նախապատրաստել։ Եթե լինեն բարդ հարցեր, որոնց ես չկարողանա անգլերենով սահուն պատասխանել, ապա կօգտվեմ թարգմանչի ծառայությունից»,-ասաց նա։
Նշենք, որ մրցույթում արգելված չէ պլաստիկ վիրահատությունների դիմած աղջիկների մասնակցությունը, չնայած որ հաղթողները գրեթե միշտ ունեն բնական գեղեցկություն։ Դայանան ևս բնական գեղեցկության կողմնակից է։
Գեղեցկուհին յուրօրինակ լուսանկար էր ուզում, բայց հայտնվեց տհաճ իրավիճակում. տեսանյութ
«Ես երբևէ պլաստիկ միջամտության չեմ դիմել, լինզա չեմ կրում: Չեմ սիրում նաև միանման «սարքած» դեմքերը։ Սակայն երբեք այս կամ այն մարդու արտաքինի վերաբերյալ կարծիք չեմ հայտնի, որովհետև չեմ սիրում մարդկանց քննադատել։ Երբեք չեմ ասի, թե այս աղջիկն ինչու է շուրթերի ծավալը մեծացրել կամ քիթը փոքրացրել»,-ասաց Դայանան և հավելեց, որ պլաստիկ վիրահատությունների միջոցով աղջիկները ձեռք են բերում այն ինքնավստահությունը, որը գուցե մանկուց պակասել է։
Գեղեցկուհին շեշտեց, որ մեծ պատասխանատվությամբ է Հայաստանը ներկայացնելու մրցույթում, քանի որ այդպես կիրականացնի նաև իր մանկության երազանքը, որն այդ բեմում հայտնվելն է։
«Այսօր երազանքս մեկն է ՝ հաղթել մրցույթում։ Իսկ առհասարակ երազում եմ լավ մասնագետ դառնալ և մեծ ընտանիք ունենալ»,-ասաց նա։
Հիշեցնենք, որ Դայանան 21 տարեկան է։ Հասակը 1.72 սմ է, քաշը՝ 52 կգ: Սովորում է Ճարտարապետության և շինարարության Հայաստանի ազգային համալսարանի Գրաֆիկական դիզայն բաժնի 4-րդ կուրսում: Սիրում է մուտիպլիկացիոն կերպարներ պատրաստել։
«Միսս տիեզերք 2019» մրցույթն այս տարի էլ է ընթանալու երեք փուլով։ Աղջիկները կներկայանան լողազգեստով, ազգային տարազով և երեկոյան զգեստով: Կլինի հարցազրույցի փուլ, որտեղ աղջիկները հնարավորություն կունենան ներկայանալու ժյուրիի անդամներին։ Երեք փուլերից հետո կընտրվեն լավագույն 20 գեղեցկուհիները, այնուհետև լավագույն 10-ը , 5-ը, 3-ը և, իհարկե, մրցույթի հաղթողը:
Ի տարբերություն այլ գեղեցկության մրցույթների, «Միսս տիեզերքը» չունի առցանց քվեարկություն:
