ԵՐԵՎԱՆ, 21 նոյեմբերի — Sputnik. Մեղադրանք է առաջադրվել Ճանապարհային ոստիկանության պետի տեղակալին. նա կալանավորվել է։ Այս մասին հայտնում է Հատուկ քննչական ծառայությունը։
«ՃՈ ծառայության պետի` հաշվառման-քննական և տրանսպորտային միջոցների տեխնիկական փորձաքննության գծով տեղակալ Արթուր Տոնոյանին մեղադրանք է առաջադրվել երկու հոդվածով։ Մասնավորապես` ՀՀ քրեական օրենսգրքի 195-րդ հոդվածի 2-րդ մասի 3-րդ կետով (հակամրցակցային գործունեությունը) և 308-րդ հոդվածի 1-ին մասով (պաշտոնեական լիազորությունները չարաշահելը)»,–հայտնում է ՀՔԾ–ն։
Տոնոյանը, չարաշահելով պաշտոնեական լիազորությունները, համաձայնեցված գործողություններով սահմանափակել է ՀՀ ոստիկանությանը տրանսպորտային միջոցների հաշվառման համարանիշների մատակարարման հնարավորություն ունեցող մասնավոր ընկերությունների միջև մրցակցությունը։ Նա կատարել է նաև նպատակաուղղված գործողություններ ընկերություններից մեկի մուտքը ՀՀ շուկա խոչընդոտելու ուղղությամբ։ Այդ կերպ Տոնոյանը, ըստ ՀՔԾ–ի, ապահովել է 2-րդ ընկերության մենաշնորհային դիրքը ՀՀ շուկայում և նպաստել վերջինիս կողմից սահմանված խտրական գները պահպանելուն։ Այս ամենի հետևանքով պետության օրինական շահերին պատճառվել է էական վնաս:
Սուրիկ Խաչատրյանին որոշել են կալանավորել
Այսօր Արթուր Տոնոյանի նկատմամբ որպես խափանման միջոց է ընտրվել կալանավորումը: Նախաքննության շահերից ելնելով` ՀՀ հատուկ քննչական ծառայությունը քրեական գործի քննության այս փուլում ձեռնպահ է մնում այլ մանրամասներ հայտնելուց:
Նախաքննությունը շարունակվում է:
