Հոգեկան առողջության կենտրոնները համարվում են պետության հսկողության տակ գտնվող փակ հաստատություններ, հետևաբար, եթե դրանցում տեղի է ունենում մարդու իրավունքների որևէ խախտում, նշանակում է՝ պետությունն է խախտել մարդու հիմնարար իրավունքները: Այս մասին Sputnik Արմենիայի հետ զրույցում ասաց փաստաբան Մարատ Ատովմյանը։
Փաստաբանն առիթ ունեցել է լինել նման հաստատություններից մեկում, ու տպավորություններն, ըստ նրա` շատ ծանր են և՛ մարդկային, և՛ զգացական, և՛ հոգեբանական առումով:
«Հույս ունեմ, որ պատկան մարմիններն ավելի լուրջ ուշադրություն կդարձնեն նշված համակարգի վրա, որտեղ իսկապես լուրջ բարեփոխումների անհրաժեշտություն կա: Հասկանում եմ, որ դա պահանջում է ֆինանսական զգալի ներդրումներ, սակայն պետք է խնդիրները բարձրաձայնել և գտնել շուտափույթ լուծումներ»,- նշեց նա:
Խելագարվե՞լ է արդյոք Կարեն Հունանյանը. ՔԿՀ պատասխանը
Փաստաբանի կարծիքով՝ այստեղ կան նաև խորհրդային ժամանակներից մնացած ավանդույթներ, երբ նախկինում հոգեբուժական կենտրոնները նույնիսկ օգտագործվել են քաղաքական նպատակներով, որպեսզի մեկուսացնեին իշխանությունների համար անհաճո մարդկանց: Հետևաբար, չափազանց կարևոր է նման հաստատություններում հանրային վերահսկողություն իրականացնելու հանգամանքը:
Սևանի հոգեբուժական հիվանդանոցում 50 մլն դրամի չարաշահումներ են հայտնաբերել
Ատովմյանը պատրաստ է իր մասնագիտական աջակցությունը ցուցաբերել նման կարգի բուժհաստատություններին՝ իրենց իրավական ընթացակարգերը հստակեցնելու, մշակելու գործում, որպեսզի դրանք հետագայում չհանգեցնեն խախտումների:
