ԵՐԵՎԱՆ, 15 նոյեմբերի — Sputnik. «Հայաստան» համահայկական հիմնադրամի նախկին տնօրեն Արա Վարդանյանը կշարունակի մնալ անազատության մեջ։ Facebook սոցիալական ցանցի իր էջում այս մասին գրել է Վարդանյանի պաշտպան Երվանդ Վարոսյանը։
Քոչարյանի պաշտպանը դիմել է արդարադատության նախարարին
«Վերաքննիչ քրեական դատարանը մերժել է մեր ներկայացրած միջնորդությունը։ Վարդանյանը կշարունակի մնալ անազատության մեջ այն պայմաններում, երբ դրա համար օրենքով նախատեսված որևէ պայման ու հիմք գոյություն չունի, երբ նա մեկ տարի ու երեք ամիս լինելով մեղադրյալի կարգավիճակում` որևէ կերպ չի խախտել իր նկատմամբ կիրառված խափանման միջոց գրավի որևէ պայման»,– գրել է նա։
Վարոսյանի խոսքով` սա նշանակում է, որ Արա Վարդանյանի ու հիմնադրամի նկատմամբ կա «հատուկ» ուշադրություն իշխանության կողմից, հակառակ պարագայում նման որոշումներն ուղղակի բացառված էին։ Իսկ սա էլ իր հերթին, ըստ պաշտպանի, նշանակում է, որ Վարդանյանը հետապնդվում ու փաստացի պատժի է ենթարկվում միայն իր քաղաքական ու հասարակական գործունեության համար։
Հիշեցնենք, որ հոկտեմբերի 11–ին ԱԱԾ–ն հայտարարություն էր տարածել` ասելով, որ Վարդանյանին նոր մեղադրանք է առաջադրվել։
2018 թվականի հուլիսի 2-ին Վարդանյանին մեղադրանք էր առաջադրվել ՀՀ քրեական օրենսգրքի 214-րդ հոդվածի 1-ին մասի (ծառայողների կողմից լիազորությունները չարաշահելը) հատկանիշներով։ Քննչական մարմնի որոշմամբ` առաջադրված մեղադրանքը փոփոխվել, լրացվել և կրկին մեղադրանք է առաջադրվել ՀՀ քրեական օրենսգրքի նույն 214-րդ հոդվածի 1-ին մասով, 179-րդ հոդվածի 3-րդ մասի 1-ին կետով (առանձնապես խոշոր չափերի յուրացում կամ վատնում) և 325-րդ հոդվածի 2-րդ մասով (մի խումբ անձանց կողմից փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը)։
Բացահայտված նոր փաստերով ու լրացված մեղադրանքով, 2019–ի հոկտեմբերի 9-ին Երևան քաղաքի ընդհանուր իրավասության դատարանը բավարարել է Քննչական մարմնի միջնորդությունը` Արա Վարդանյանի նկատմամբ կիրառված խափանման միջոց գրավը կալանավորմամբ փոխարինելով։
Արա Վարդանյանը «Հայաստան» հիմնադրամի գումարները վերադարձրել է. հայտարարություն
