ԵՐԵՎԱՆ, 11 հոկտեմբերի — Sputnik. «Հայաստան» համահայկական հիմնադրամի նախկին գործադիր տնօրեն Արա Վարդանյանին նոր մեղադրանք է առաջադրվել։ Այս մասին հայտնում է ՀՀ ազգային անվտանգության ծառայությունը։
2018 թվականի հուլիսի 2-ին Արա Վարդանյանին մեղադրանք էր առաջադրվել ՀՀ քրեական օրենսգրքի 214-րդ հոդվածի 1-ին մասի (ծառայողների կողմից լիազորությունները չարաշահելը) հատկանիշներով։ Քննչական մարմնի որոշմամբ` առաջադրված մեղադրանքը փոփոխվել, լրացվել և կրկին մեղադրանք է առաջադրվել ՀՀ քրեական օրենսգրքի նույն 214-րդ հոդվածի 1-ին մասով, 179-րդ հոդվածի 3-րդ մասի 1-ին կետով (առանձնապես խոշոր չափերի յուրացում կամ վատնում) և 325-րդ հոդվածի 2-րդ մասով (մի խումբ անձանց կողմից փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը)։
«Քրեական գործի նախաքննությամբ պարզվել են նոր հանգամանքներ, մասնավորապես` 2017 թվականի հոկտեմբերի 26-ին Արա Վարդանյանը` որպես հիմնադրամի տնօրեն, պայմանագիր է կնքել Արցախի Հանրապետության Ասկերանի, Շահումյանի, Մարտակերտի, Հադրութի, Քաշաթաղի և Մարտունու շրջանների վարչակազմերի կրթության բաժիններին 149 474 540 դրամի գույք մատակարարելու մասին, բայց չի մատակարարել, իսկ հիմնադրամից դուրս գրված գումարը յուրացնելու նպատակով կազմել է կեղծ հանձնման-ընդունման ակտեր»,– նշված է հաղորդագրության մեջ:
Բացահայտված նոր փաստերով ու լրացված մեղադրանքով, 2019 թվականի հոկտեմբերի 9-ին Երևան քաղաքի ընդհանուր իրավասության դատարանը բավարարել է Քննչական մարմնի միջնորդությունը` Արա Վարդանյանի նկատմամբ կիրառված խափանման միջոց գրավը կալանավորմամբ փոխարինելով։
Նշենք, որ Վարդանյանի պաշտպաններ Լուսինե Սահակյանն ու Երվանդ Վարոսյանը հոկտեմբերի 9-ին հայտարարություն էին տարածել` նշելով, որ մեղադրանք առաջադրելու համար պատրվակ է հանդիսացել հիմնադրամի ենթակա ձեռնարկություններից մեկի արտադրանքը հասցեատերերին մատակարարված չլինելու հանգամանքը, ինչի հետ Արա Վարդանյանը առնչություն ունենալ չէր կարող։
Հիշեցնենք, որ 2018 թվականի հուլիսին Վարդանյանը բերման էր ենթարկվել յուրացումներ կատարելու, ինչպես նաև հասարակական կազմակերպության ծառայողի լիազորությունները չարաշահելու կասկածանքով
Վարդանյանը խոստովանել էր, որ տնօրինելով հիմնադրամին տրամադրված 25 միլիոն դրամի վարկային գծով բանկային քարտը, առցանց խաղատներում խաղադրույքներ է կատարել: Ավելի ուշ Արա Վարդանյանը 1 մլն գրավի դիմաց ազատ էր արձակվել, իսկ հուլիսի 10-ին` հրաժարականի դիմում ներկայացրել։
Արա Վարդանյանը «Հայաստան» հիմնադրամի գումարները վերադարձրել է. հայտարարություն
