ԵՐԵՎԱՆ, 15 նոյեմբերի — Sputnik. Հայաստանի ռազմարդյունաբերության ոլորտի հատկացումները 2020 թ.–ին այս տարվա համեմատ ավելացել են շուրջ 22%-ով:
Այս մասին այսօր` նոյեմբերի 15-ին, ՀՀ Ազգային ժողովում, 2020թ.–ի պետական բյուջեի մասին օրենքի նախագծի քննարկման ժամանակ հայտնեց Բարձր տեխնոլոգիական արդյունաբերության նախարար Հակոբ Արշակյանը:
«Հայաստանը բարձր տեխնոլոգիական ռազմարդյունաբերություն արտադրող և արտահանող երկիր դարձնելու նպատակով 2020թ. պետական բյուջեով նախատեսված է նախարարությանը տրամադրել 12.5 մլրդ դրամ»,– ասաց նախարարը։
Այդ հատկացման մի մասը, Արշակյանի խոսքով, ուղղվելու է գիտահետազոտական, փորձակոնստրուկտորական ծրագրերի իրականացմանը, մյուսը` արտադրական կարողությունների զարգացմանը։
Ռազմաարդյունաբերության ոլորտի զարգացման համար լայնամասշտաբ ծրագիր կա. նախարար
Հատկացումների ուղղությունները որոշվել են ՀՀ պաշտպանական կարիքները և հայաստանյան արտադրանքով արտաքին շուկաներ դուրս գալու հնարավորությունները հաշվի առնելով։
