ԵՐԵՎԱՆ, 13 նոյեմբերի — Sputnik. Ամեն տարի մոտավորապես մինչև 1.5 մլն զույգ կոշիկ է Հայաստանից ՌԴ շուկա արտահանվում և կոշիկի հայաստանյան արտադրողներին պետք է իրազեկել մինչև հաջորդ տարվա մարտի 1-ը իրենց արտադրանքի համար պարտադիր մակնշման պահանջի մասին։ Այս մասին Sputnik Արմենիա մամուլի կենտրոնում լրագրողներին ասաց Եվրասիական տնտեսական հանձնաժողովի կոլեգիայի նախագահի օգնական Վիկտոր Գրինևը։
«Մարտի 1-ից Ռուսաստանը Հայաստանից ներկրվող կոշիկի մակնշման պահանջ է մտցնում։ Դուք բավական մեծ ծավալ եք մատակարարում. Հայաստանից ՌԴ շուկա տարեկան շուրջ 1.5 մլն զույգ կոշիկ է արտահանվում, ընդ որում, դրանք մեծ արտադրություններ չեն, որոնք փոքր խմբաքանակ են մատակարարում»,–ասաց Վիկտոր Գրինևը։
Նրա խոսքով` անհրաժեշտ է նաև որոշել` ինչպես աջակցել այդ մատակարարումներին, որպեսզի Ռուսաստանի կողմից մտցվող մակնշումը խոչընդոտ չհանդիսանա հայ արտադրողների համար։
Հարցին` տեղափոխման ժամանակ բարդություններից խուսափելու համար ինչպե՞ս մինչև մարտի 1-ը կոշիկի մատակարարներին իրազեկել մակնշման անհրաժեշտության մասին, Գրինևը պատասխանեց, որ դետալներն այս պահին մշակման փուլում են։
«Ամենայն հավանականությամբ, այդ մասին նրանց պետք է տեղեկացնեն ազգային օպերատորները»,–նշեց նա։
Ինչպես պաշտպանել ԵԱՏՄ սպառողներին. Մինասյանը խոսել է կեղծ ապրանքների դեմ պայքարի մասին
Գրինևն ընդգծեց, որ առաջնահերթություններից մեկը երկրների միջև ապրանքների անխոչընդոտ շարժն ապահովելու հարցն է, որը տարբեր երկրներ յուրովի են լուծում։
«ԵԱՏՄ–Ռուսաստան խոշորագույն շուկան արդեն իսկ որոշում է ընդունել չորս ապրանքների մակնշման վերաբերյալ, իսկ առաջիկայում նախատեսվում է մակնշում կիրառել ևս 12 անուն ապրանքների համար», – նշեց նա` ավելացնելով, որ Ռուսաստանի ղեկավարությունը հետագայում նախատեսում է ընդլայնել այդ ցանկը։
Եվրասիական տնտեսական միության երկրները մինչև մյուս տարվա հունվարի 1-ը պետք է կողմնորոշվեն կոշիկի մակնշման ազգային օպերատորի հարցում։ Համապատասխան որոշումն ընդունել է Եվրասիական տնտեսական հանձնաժողովը (ԵՏՀ)։ Ինչպես նշվում է փաստաթղթում, դա արվում է մակնշված կոշիկի արտադրանքի անխոչընդոտ շրջանառության ապահովման նպատակով։
Ընդ որում, մինչև այդ օրը պետք է պատրաստ լինի նաև միության անդամ երկրների օպերատորների փոխգործակցության համակարգը։ Այն իրականացվելու է ԵԱՏՄ միասնական տեղեկատվական համակարգի միջոցով։ 2016 թվականին ԵԱՏՄ երկրներում մտցվել է մուշտակների և մորթե իրերի պարտադիր մակնշում` RFID պիտակներով։
Դեկտեմբերին կսկսեն մակնշել օծանելիքը, լուսանկարչական ապարատները, անվադողերը, ինչպես նաև թեթև արդյունաբերության որոշ ապրանքներ, այդ թվում` վերարկուները, բաճկոնները, սպիտակեղենն ու սփռոցները։
Ժամանակն է միմյանցից սովորելու. Սուրեն Գյուրջինյանը` ԵԱՏՄ–ում էներգախնայողության մասին
Փաթեթավորման վրայի հատուկ երկչափ կոդերով ցանկացած գնորդ կկարողանա իր հեռախոսի օգնությամբ ստուգել արտադրանքի օրինական լինելը։
Հիշեցնենք, որ «Անտիկոնտրաֆակտ 2019» միջազգային խորհրդաժողովը Երևանում մեկնարկել է նոյեմբերի 12–ին։ Այն նվիրված է արդյունաբերական արտադրանքի ապօրինի շրջանառությանը հակազդելու հարցերին։
