ԵՐԵՎԱՆ, 12 նոյեմբերի – Sputnik. Բերիո Հայոց թեմը դատապարտում է Սիրիայի Թել Աբյադ քաղաքում գտնվող Սուրբ Խաչ եկեղեցու նորոգումն ու այնտեղ եկեղեցական արարողություն կազմակերպելու թուրքական նախաձեռնությունը: Այս մասին նշված է թեմի տարածած հայտարարության մեջ։
«Լիահույս ենք, որ Դիարբեքիրի Սուրբ Կիրակոս եկեղեցին կվերաբացվի». Արագած Ախոյան
Վերջերս թուրքական մի շարք լրատվամիջոցներ գրեցին Թուրքիայի կողմից բռնագրավված Թել Աբյադ քաղաքի հայ առաքելական Սուրբ Խաչ եկեղեցում կատարված աղոթքի մասին։ Բերիո Հայոց թեմը դատապարտել է այդ նախաձեռնությունը մի քանի նկատառումով։
«Թուրքիայի և հայ ժողովրդի միջև մինչ այսօր կա Հայոց ցեղասպանության չլուծված հարցը։ Նույն թուրքն ավելի քան 100 տարի նույն անմխիթար ու լքված վիճակում է թողել Թուրքիայի տարածքում գտնվող մեր հազարավոր եկեղեցիները, իսկ թուրքական պետությունը տարիների ընթացքում ոչ մի քայլ չի ձեռնարկել այդ ամենը կասեցնելու համար։ Սիրիայում կան նաև հայկական այլ եկեղեցիներ, որոնք գտնվում են թուրքական կողմի և նրան ենթակա խմբավորումների վերահսկողության տակ։ Ուստի անհասկանալի է Թել Աբյադի հայկական եկեղեցու նկատմամբ հետաքրքրության պատճառները»,– նշված է հայտարարության մեջ։
Բերիոյ Հայոց թեմը նշում է, որ Թել Աբյադը սիրիական հող է, որն այս պահին բռնագրավել է Թուրքիան։ Քանի դեռ Թել Աբյադն ամբողջովին չի ազատագրվել, չի կարելի մեկնել այնտեղ և ծիսակատարություն անցկացնել եկեղեցում։ Ահաբեկչական տարբեր խմբավորումները Սիրիայի պատերազմի տարիներին պղծել են Բերիոյ Հայոց թեմին պատկանող Սուրբ Խաչ եկեղեցին։ Թել Աբյադն ազատագրելուց և եկեղեցին վերաօծելուց հետո միայն կարելի է այնտեղ եկեղեցական արարողություն կատարել, իսկ այն, ինչ հիմա կատարվում է գրավված քաղաքում, քարոզչական նկատառումներով կատարվող ոտնձգություններ են։
Նշենք, որ թուրքական ԶԼՄ–ներ գրում են, որ եկեղեցին վերանորոգվել է և անցած կիրակի արդեն սկսել է գործել։
Սուրբ Խաչը կառուցել են Հայոց ցեղասպանությունից փրկված և Սիրիայում հաստատված հայերը 1923թ-ին:
Նախկինում Թել Աբյադը գտնվում էր Սիրիայի քրդական ուժերի վերահսկողության տակ, սակայն Թուրքիայի զինված ուժերի իրականացրած «խաղաղության աղբյուր» ռազմական գործողությունից հետո այն անցավ թուրքերի և նրանց հարող խմբավորումների վերահսկողության տակ:
Բերիո Հայոց թեմը Մեծի Տանն Կիլիկիո կաթողիկոսության երկրորդ մեծ և հնագույն թեմն է։ Առաջնորդանիստը Հալեպի Սրբոց Քառասնից Մանկանց Մայր Եկեղեցին է:
Թուրքիայում գտնվող հայկական եկեղեցիներից մեկը թանգարանի կվերածվի
