ԵՐԵՎԱՆ, 12 նոյեմբերի — Sputnik. Գեներալ Մանվել Գրիգորյանը ներկա է իր դեմ հարուցված քրեական գործով նիստին։ Նիստն ընթանում է Երևանի ընդհանուր իրավասության դատարանում` դատավոր Մնացական Մարտիրոսյանի նախագահությամբ։
Գրիգորյանին դատարանում ուղեկցում են շտապօգնության աշխատակիցները։ Նա շնչում է թթվածին ապահովող սարքի օգնությամբ։
Նշենք, որ դատական նիստը կես ժամով ընդմիջվեց, քանի որ Գրիգորյանի վիճակն այնքան էլ լավ չէր։ Դատավորը հավելեց, որ այդ ընթացքում ինքն էլ խորհրդակցական սենյակ կհեռանա` պաշտպանների ներկայացրած ինքնաբացարկի միջնորդության որոշում կայացնելու։
Ավելի ուշ դատարանը որոշեց մերժել Մանվել Գրիգորյանի պաշտպանների միջնորդությունը. Մնացական Մարտիրոսյանը կշարունակի նախագահել քրգործով նիստերը։
Բժիշկները կայցելեն Մանվել Գրիգորյանին. նրան նորից կհետազոտեն
Հայտնել էինք, որ առողջական վիճակի պատճառով նախորդ մի քանի նիստերին Գրիգորյանը չէր մասնակցում։
Հիշեցնենք, որ նոյեմբերին 5–ին` նախորդ նիստի ժամանակ, դատավոր Մնացական Մարտիրոսյանը որոշեց Գրիգորյանի խափանման միջոց կալանքը չփոխել` մերժելով պաշտպանների միջնորդությունը։
Մանվել Գրիգորյանի կինը յուրացրել է պետական գույքը. իրավապահների նոր բացահայտումը.տեսանյութ
Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ: Նրան մեղադրանք է առաջադրվել 2018թ.–ի հունիսի 19-ին։
