ԵՐԵՎԱՆ, 11 նոյեմբերի — Sputnik. Բանակում յուրաքանչյուր ինքնասպանության դեպքից հետո հետևություններն են արվում, իսկ համապատասխան պաշտոնատար անձինք իրենց պատիժն են ստանում։ Այս մասին այսօր ԱԺ–ում, լրագրողների հետ զրույցում, խոսելով ՀՀ ԶՈւ–ում տեղի ունեցող ինքնասպանության դեպքերի մասին, ասաց ՀՀ պաշտպանության նախարարի տեղակալ Գաբրիել Բալայանը։
Նրա խոսքով` զինված ուժերում տեղի ունեցող ինքնասպանությունները թերություն են։ «Ցավոք, կատարյալ կլինի, երբ ինքնասպանության կամ ինքնասպանության հասցնելու դեպքեր չլինեն։ Սակայն, մյուս կողմից, անցած տարի նույն ժամանակահատվածում 10 դեպք է եղել` այս տարվա 9 դեպքի դիմաց. անգամ մեկ կյանք փրկելը քրտնաջան աշխատանքի արդյունք է»,–ասաց նա։
Նրա խոսքով` ԶՈւ–ում շատ անելիքներ կան, որպեսզի առհասարակ բացառեն նման դեպքերը։ Սակայն, ըստ նրա, բանակում հնարավոր չէ նման դեպքերից խուսափել։
Հիշեցնենք` նոյեմբերի 5–ին, ժամը 19:30-ի սահմաններում, N զորամասի զինանոցում հայտնաբերվել է պարտադիր ժամկետային զինծառայող, շարքային Էրիկ Արարատի Հարությունյանը՝ կզակի շրջանում հրազենային վնասվածքով: Զինվորական հոսպիտալ տեղափոխվելու ճանապարհին Հարությունյանը մահացել է: Արցախի պաշտպանության նախարարությունը հայտնել էր, որ դեպքը տեղի է ունեցել Արցախում, Էրիկ Հարությունյանը 19 տարեկան էր։
ՊԲ-ն պատրաստ է կատարել ցանկացած մարտական խնդիր. Արցախում զորավարժություններ են անցկացվել
Քննչական կոմիտեն հայտարարել էր, որ Հարությունյանի մահվան դեպքով հարուցվել է քրեական գործ` ՀՀ քրեական օրենսգրքի 110-րդ հոդվածի 1-ին մասով (ինքնասպանության հասցնելը)։ Հարուցված քրգործի շրջանակներում ձերբակալվել է նրա ծառայակից ընկերը։
