ԵՐԵՎԱՆ, 5 նոյեմբերի – Sputnik. ՀՀ 3-րդ նախագահ Սերժ Սարգսյանը և ՀՀ-ում ԱՄՆ դեսպան Լին Թրեյսին այսօր` նոյեմբերի 5-ին, հանդիպել են ՀՀԿ կենտրոնական գրասենյակում։ Այս մասին նշված է Սերժ Սարգսյանի պաշտոնական կայքում։
Հանդիպմանը մասնակցել են ՀՀԿ ԳՄ և ԱՄՆ դեսպանության ներկայացուցիչներ:
«Ես արժևորում եմ ԱՄՆ դեսպանատան երկարամյա հարաբերությունները Հայաստանի քաղաքական կուսակցությունների, այդ թվում՝ ՀՀԿ-ի հետ։ Միացյալ Նահանգները շարունակում է հավատարիմ մնալ Հայաստանի ժողովրդավարական, տնտեսական ու սոցիալական կառավարմանն աջակցելու իր հանձնառությանը, ինչպես դա եղել է մեր դիվանագիտական հարաբերությունների 27 տարիներին»,-ասել է դեսպան Թրեյսին:
Հանդիպման ընթացքում դեսպանը ՀՀԿ նախագահից հետաքրքրվել է կուսակցության առաջիկա ծրագրերով ու գործունեության ուղղություններով և հավաստիացրել, որ այսուհետ նման հանդիպումներ պարբերաբար կնախաձեռնվեն:
Սերժ Սարգսյանը դեսպան Թրեյսիին է ներկայացրել նաև Հայաստանի ներքաղաքական իրավիճակը, առկա մտահոգությունները, դրանց վերաբերյալ ՀՀԿ դիրքորոշումները, անդրադարձել տնտեսության և անվտանգության խնդիրներին ու մարտահրավերներին, ԼՂ հակամարտության կարգավորման բանակցային գործընթացի ներկա վիճակին, ինչպես նաև հայ-ամերիկյան հարաբերությունների զարգացման հեռանկարին:
Պետականը սեփականի հետ չխառնենք. Փաշինյանը ցույց է տվել Սերժ Սարգսյանի նախկին առանձնատունը
Սերժ Սարգսյանը շնորհակալություն է հայտնել ԱՄՆ Ներկայացուցիչների պալատի` Հայոց ցեղասպանության բանաձևի ընդունման կապակցությամբ:
«Հայաստանի իրական ժողովրդավարացումն այլընտրանք չունի: Մենք երկար տարիներ աշխատել ենք այդ ուղղությամբ` միաժամանակ կառուցելով փոխշահավետ գործընկերային հարաբերություններ, այդ թվում՝ ԱՄՆ-ի հետ: Իրական ժողովրդավարությունն է աշխարհում շատ պետությունների համար լրջագույն մարտահրավեր դարձած պոպուլիզմի պատասխանը:
Ի՞նչ կապ ունի Կենտրոնի թաղապետի հրաժարականը Սերժ Սարգսյանի փեսայի հետ
Մեր կուսակցության համար շարունակելու են գերակա մնալ Հայաստանի և Արցախի անվտանգության, տարածաշրջանում կայունության և խաղաղության հարցերը»,-ասել է Սերժ Սարգսյանը:
Նշենք, որ Սերժ Սարգսյանը 2008-2018թթ. եղել է ՀՀ նախագահ։ 2018 թ-ի ապրիլի 23-ին նա հրաժարական տվեց և հեռացավ ակտիվ քաղաքականությունից։
