ԵՐԵՎԱՆ, 1 նոյեմբերի — Sputnik. Հայաստանում Ռուսաստանի դեսպանատունն իր զարմանքն է հայտնել կապված Հայաստանում ՌԴ ԶՈւ կայանի ներկայության մասին զեկույցի հետ։
«Ռուսական ռազմական ներկայությունը Հայաստանում, Մոլդովայում և Ուկրաինայում և դրա ազդեցությունը մարդու իրավունքների վրա» խորագրով զեկույցը ներկայացվել է Երևանում։
Զեկույցի դոնորներն են Եվրամիության Արևելյան գործընկերության Քաղաքացիական հասարակության համաժողովը (CSF EP), Ժողովրդավարության ազգային հիմնադրամը (NDF), որը ֆինանսավորվում է ԱՄՆ–ի կառավարության կողմից։
«Հաշվի առնելով ֆինանսավորման աղբյուրները` անհասկանալի է, ինչպես կարող են նման հետազոտություններն օբյեկտիվ լինել»,– նշված է դեսպանատան հայտարարության մեջ։
Միաժամանակ դեսպանատանը կարևորում են, որ հայ հասարակությունը տեղեկացված լինի 102–րդ ռազմակայանի գործունեության տարբեր ասպեկտների մասին։
«Մենք բաց ենք երկխոսության համար և լրիվ թափանցիկ ենք աշխատում», – նշված է հայտարարության մեջ։
Նշենք` Հայաստանում ռուսական զինվորականների մեծ մասը ՀՀ քաղաքացիներ են, որոնք ներառված են Իրանի ու Թուրքիայի սահմանի հսկողության մեջ։
Ռուսաստանի ԶՈւ Հարավային ռազմական օկրուգի մեջ մտնող 102-րդ ռազմակայանը Գյումրիում է տեղակայվել 1995 թվականին Հայաստանի ու Ռուսաստանի միջպետական համաձայնագրով:
Ավելի վաղ Ռուսաստանի դեսպանատունը հայտարարություն էր տարածել ՌԴ պաշտպանության նախարար Սերգեյ Շոյգուի հայաստանյան այցի կողմնապահ հայտարարությունների մասին։ Նման հայտարարությունների նպատակը երկու երկրների հարաբերությունների մեջ պառակտում մտցնելն է, ինչը հակասում է Հայաստանի ու Ռուսաստանի շահերին, նշված էր հայտարարության մեջ։
