ԵՐԵՎԱՆ, 30 Հոկտեմբեր — Sputnik. ՀՀ երկրորդ նախագահ Ռոբերտ Քոչարյանն ընդդեմ գործարար Սիլվա Համբարձումյանի գործով դատական նիստը երեկ չի կայացել։ Այս մասին հայտնում է ՀՀ երկրորդ նախագահի փաստաբանական խումբը։
«Գործը քննող Երևան քաղաքի առաջին ատյանի դատավոր Էդիկ Ավետիսյանը մասնակցում էր ամենամյա սեմինարին։ Հաջորդ դատական նիստի օրվա և ժամի վերաբերյալ հավելյալ կծանուցվի»,–նշված է հաղորդագրության մեջ։
Հիշեցնենք, որ հայցադիմումը ներկայացվել է Ռոբերտ Քոչարյանի փաստաբան Արամ Օրբելյանի կողմից՝ զրպարտություն հանդիսացող փաստացի տվյալները հերքելու և երկու միլիոն ՀՀ դրամ փոխհատուցում բռնագանձելու պահանջներով: Հայցադիմումի հիմք է հանդիսացել Սիլվա Համբարձումյանի կողմից 2018–ի փետրվարի 11–ին ասուլիսի ժամանակ հնչեցված արտահայտությունը, թե նա 2008 թվականին խոշոր գործարք է արել արաբների հետ և իրեն չխանգարելու համար վճարել է նաև հանրապետության նախագահ Քոչարյան Ռոբերտին։
