ԵՐԵՎԱՆ, 29 հոկտեմբերի – Sputnik. Հայաստանում գործող կենսաբանական լաբորատորիաներն օգտագործվում են զուտ բժշկական նպատակներով։ Այս մասին ասել է ՀՀ վարչապետ Նիկոլ Փաշինյանը` պատասխանելով «Կոմերսանտ» թերթի թղթակցի հարցին։
Ավելի վաղ հայտնել էինք, որ Ռուսաստանի արտգործնախարար Սերգեյ Լավրովն առաջիկայում այցելելու է Երևան, այդ այցի ընթացքում հուշագիր է ստորագրվելու, որով թույլատրվելու է ռուս փորձագետների մուտքը կենսալաբորատորիաներ։
«Մենք աշխատում ենք հուշագրի վրա: Անցյալ տարի իմ անձնական հանձնարարությամբ ռուս մասնագետներին թույլ տրվեց այցելել այդ օբյեկտներ՝ համոզվելու, որ դրանք որևէ սպառնալիք չեն պարունակում Ռուսաստանի համար: Դրանք ընդհանրապես չունեն ռազմական նշանակություն։ Սրանք կենսաբանական լաբորատորիաներ են, որոնք օգտագործվում են զուտ բժշկական նպատակներով: Կարծում եմ, մեր ռուս գործընկերները համոզվեցին դրանում»,– ասել է Փաշինյանը:
Վարչապետի խոսքով` այս փաստաթղթի հիմնական նպատակը բոլոր կողմերի շահերի պաշտպանությունն է, որպեսզի գործընկերներից որևէ մեկի մոտ չլինի որևէ անհանգստություն այդ լաբորատորիաների վերաբերյալ:
Մոսկվան ու Երևանը փաստաթուղթ կստորագրեն կենսալաբորիատորիաների ու զինվորականների մասին
