ԵՐԵՎԱՆ, 18 դեկտեմբերի — Sputnik. Հայաստանում գործող կենսալաբորատորիաների տարածքում արտասահմանյան զինվորականների ներկայությունը բացառելու վերաբերյալ վերջնական պայմանավորվածություն առայժմ չկա։ Այսօր` դեկտեմբերի 18-ին, հրավիրված ասուլիսի ժամանակ այս մասին ասաց Հայաստանում Ռուսաստանի արտակարգ և լիազոր դեսպան Սերգեյ Կոպիրկինը։
«Որքան ինձ է հայտնի, երկու երկրների միջև, ինչպես նաև հետխորհրդային այլ երկրների հետ կենսալաբորատորիաների վերաբերյալ քննարկումներ են ընթանում։ Կարծում եմ` բավականին կառուցողական երկխոսություն է ընթանում, կա փոխըմբռնում, չեմ բացառում, որ մենք ինչ–որ պայմանավորվածությունների կհանգենք», – ասաց դեսպանը։
Նա ավելացրեց, որ առայժմ պարզ չէ, թե երբ և ինչ պայմանավորվածություն կլինի։
Կոպիրկինը նշեց, որ ինչ–որ արգելքների մասին խոսք լինել չի կարող. խոսքը երկու ինքնիշխան և իրավահավասար պետությունների մասին է:
Ինչ վերաբերում է զինծառայողներին, ապա ՀԱՊԿ շրջանակում կա նման մոտեցում, երկրները պետք է հարցը համակարգեն կազմակերպության անդամ երկրների հետ։
Հիշեցնենք` Ռուսաստանի արտգործնախարար Սերգեյ Լավրովն «Կոմսոմոլսկայա պրավդային» տված հարցազրույցում ասել էր, որ Մոսկվան ու Երևանը կստորագրեն մի փաստաթուղթ, որը կերաշխավորի արտասահմանցի զինվորականների բացակայությունը Հայաստանում գործող կենսալաբորատորիաների տարածքում։
Նախարարը կարծում է, որ դա թույլ կտա կենսալաբորատորիաների աշխատանքն ավելի թափանցիկ դարձնել։ Լավրովի խոսքով` թեև Հայաստանն ու Վրաստանը ռուս դիվանագետների համար ազատ մուտք են բացել դեպի լաբորատորիաներ, այնտեղ պետք է ստուգումներ անցկացնեն մասնագետները, ոչ թե գերատեսչությունների ներկայացուցիչները։
