ԵՐԵՎԱՆ, 25 հոկտեմբերի — Sputnik. «Ժողովուրդ» թերթի տվյալներով` ԱԺ «Իմ քայլը» խմբակցության պատգամավորները խիստ նկատողություն են ստացել։
«Երեկ` ԱԺ նիստերի ավարտից անմիջապես հետո, ԱԺ «Իմ քայլը» խմբակցության պատգամավորները շտապել են ՔՊ կուսակցության կենտրոնական գրասենյակ, որտեղ խմբակցության դռնփակ նիստ են անցկացրել»,–գրում է թերթը:
«Ժողովուրդ» օրաթերթին հայտնի է դարձել, որ նիստի ընթացքում, ի թիվս այլ հարցերի, նաև քննարկվել են կարգապահական, մասնավորապես` խմբակցության նիստերից բացակայելու հարցը: «Բանն այն է, որ վերջերս 88 հոգանոց խմբակցությունից նիստերին մասնակցում է ամենաշատը 25-30 պատգամավոր, մյուսները առհասարակ խմբակցության նիստերին չեն գալիս»,–գրում է թերթը:
«Ժողովուրդ» օրաթերթը տեղեկացավ, որ նիստում բացակաների հարցը շատ խիստ է դրվել` ասելով, որ այլևս պետք է բացակայելը բացառել, քանի որ նիստերի ընթացքում կարևոր որոշումներ են կայացվում, և բոլորի ներկայությունը պարտադիր է: Ըստ այդմ, թերթի տվյալներով, բացականերին շատ խիստ նկատողություն է տրվել։
