ԵՐԵՎԱՆ, 19 հոկտեմբերի-Sputnik. ՀՀ վարչապետ Նիկոլ Փաշինյանը բավարարված է վերջին 1.5 տարվա ընթացքում Պետական եկամուտների կոմիտեի աշխատանքով: Այս մասին նա ասաց այսօր ՊԵԿ-ի՝ Գյումրիում կազմակերպած ռազմավարական պլանավորման աշխատաժողովի ընթացքում: Փաշինյանն ընդգծեց, որ ՊԵԿ-ն իր առաջադրած խնդիրները մակրոմակարդակում լուծել է, բայց միկրոմակարդակում դեռևս կան բազմաթիվ հարցեր, որոնք լուծման կարիք ունեն:
«ՊԵԿ-ի և այս ոլորտում մեր ռազմավարական մեծագույն խնդիրն է փոխել քաղաքացու վերաբերմունքն իր վճարած հարկերի նկատմամբ, իր հարկային պարտավորությունների նկատմամբ»,- ասաց Փաշինյանը՝ կարևոր համարելով, որ ՀՀ բոլոր քաղաքացիներն արձանագրեն՝ այն գումարը, որ նրանք ՊԵԿ-ի միջոցով վճարում են պետությանը, վճարում են իրենք իրենց՝ մեր երկրում ենթակառուցվածքներ, ծառայություններ, կրթություն ունենալու համար:
Ինչ եղավ Գյումրու մաքսատունը. Անանյանի հաշիվները խառնել են շինարարները
«Թե ինչպիսի հաճույքով են վճարում հարկերը քաղաքացիները, կապված է նաև նրա հետ, թե ինչպես են ծախսվում այդ գումարները, արդյո՞ք քաղաքացիները տեսնում են, որ այդ գումարների ծախսումը կոնկրետ բան է փոխում իրենց կյանքում»,- ասել է Փաշինյանը։
Վարչապետն ընդգծել է, որ այս գործում հաջողելու համար ՊԵԿ-ի աշխատողները, հարկային, մաքսային ծառայողները պետք է փոխեն վերաբերմունքն իրենց աշխատանքի նկատմամբ:
Նա չափազանց կարևոր է համարել մաքսային և հարկային ոլորտներում կոռուպցիայի դեմ պայքարը՝ անհրաժեշտ համարելով նաև այդ ոլորտներում աշխատավարձի շարունակական բարձրացումները:
Գումարի վատնո՞ւմ, թե՞ անհրաժեշտություն. ինչ հարց է լուծելու Գյումրի տարած մաքսատունը
Հիշեցնենք, որ ՀՀ վարչապետ Նիկոլ Փաշինյանն այսօր` հոկտեմբերի 19–ին, աշխատանքային այցով հանրապետության երկրորդ քաղաք Գյումրիում է: Մինչ Պետական եկամուտների կոմիտեի` Գյումրիում կազմակերպած ռազմավարական պլանավորման աշխատաժողովին մասնակցելը նա այցելեց նոր կառուցվող ավտոմաքսատան շինհրապարակ, հետևեց ընթացող աշխատանքներին:
