ԵՐԵՎԱՆ, 18 հոկտեմբերի – Sputnik. Կադաստրի կոմիտեի արդեն նախկին ղեկավար Սարհատ Պետրոսյանի աշխատանքից քաղաքաշինության ոլորտում ու կառավարությունում դժգոհ էին։ Sputnik Արմենիայի հետ զրույցում մեկնաբանելով Սարհատ Պետրոսյանի հրաժարականի մասին լուրը, այս մասին ասաց Քաղաքաշինության կոմիտեի նախագահ Վահագն Վերմիշյանը։
«Միայն ես չեմ դժգոհ։ Իմ կարծիքով` այս ոլորտին առնչվող որևիցե մարդ, որը գործից հասկանում է, պիտի զգար, որ այդ ծառայությունը չի կայացել»,– ասաց Վերմիշյանը։
Կադաստրի կոմիտեի ղեկավարի հետ տարաձայնությունների առկայությունը ևս Քաղաքաշինության կոմիտեի նախագահը չի հերքում։
«Դա աշխատանքային նորմալ երևույթ է. մի հարցի շուրջ մարդն իր կարծիքն ունի, մենք` մերը։ Այնպես որ մենք ունենք չկայացած կադաստրի ծառայություն, և դա բոլորը գիտեն։ Բավական է՝ ուղղակի բացեք Հայաստանի կադաստրային քարտեզն ու կհամոզվենք։ Մեկուկես տարին բավական ժամանակ էր, որպեսզի այդ հարցերը շտկվեին փոքրիկ Հայաստանի համար»,– ասաց Վերմիշյանը։
Ինչ վերաբերում է Կադաստրի կոմիտեի ղեկավարի մասնագիտական կարողություններին, դրանց վերաբերյալ ևս Վերմիշյանն իր տեսակետն ունի։
«Իմ կարծիքով` այդ մարդը մի քիչ իր տեղում չէր։ Քաղաքաշինությունից նա այնքան է հեռու, որքան ես, ասենք, տիեզերագնացությունից։ Ինքը, որ հայտարարում է՝ ես քաղաքաշինարար եմ, մի քիչ զավեշտալի է հնչում»»,–ասաց Վերմիշյանը։
Հարցին, թե ով կարող է փոխարինել Սարհատ Պետրոսյանին այդ պաշտոնում, Վերմիշյանը պատասխանել չցանկացավ։
Փոխարենը համոզմունք հայտնեց, որ ոլորտը պրոֆեսիոնալ ղեկավարի հանձնելու դեպքում մեկ տարին բավական է Հայաստանի կադաստրային համակարգը հիմնավորապես կարգավորելու համար։
Վերմիշյան․ «Երկնաքերը պետք է լինի ո՛չ այդ տարածքում, և ո՛չ այդպիսի շենք»
Կադաստրի նոր ղեկավարի թեկնածության ընտրությանը Քաղաքաշինության կոմիտեի նախագահը չի մասնակցելու։ Նրա խոսքով` վարչապետն այս հարցով բավական տեղեկացված է որոշում կայացնելու համար։
Իսկ երկու կառույցների միջև տարաձայնություններին, Վերմիշյանի խոսքով, Նիկոլ Փաշինյանը տեղյակ է եղել։ Հարցին` միջոցներ ձեռնարկվե՞լ են արդյոք դրանք հարթելու համար, Վերմիշյանը չցանկացավ պատասխանել։
«Ես զբաղված եմ միայն իմ գործով։ Որևիցե քաղաքական խնդիր կամ ինտրիգ իմը չեն»,–ասաց նա։
Քանի կին կա ՀՀ կառավարությունում. Փաշինյանը թվեր է ներկայացրել
Հիշեցնենք` Կադաստրի կոմիտեի ղեկավար Սարհատ Պետրոսյանն այսօր Facebook-ում հայտնել է, որ հրաժարականի դիմում է ներկայացրել։ Պետրոսյանը մասնավորապես նշել է, որ չի կիսում կառավարության քաղաքականությունն ու առկա մոտեցումները քաղաքաշինության բնագավառում։
