ԵՐԵՎԱՆ, 17 հոկտեմբերի – Sputnik. ՌԴ ԱԳՆ պաշտոնական ներկայացուցիչ Մարիա Զախարովան այսօրվա` հոկտեմբերի 17–ի ճեպազրույցում մեկնաբանել է ՌԴ Պետդումայի պատգամավոր, ԱՊՀ հարցերի, եվրասիական ինտեգրման և հայրենակիցների հետ կապերի հանձնաժողովի առաջին փոխնախագահ Կոնստանտին Զատուլինի այցը Լեռնային Ղարաբաղ։
«Մեր կայքում արդեն վաղուց (ցավոք, համապատասխան տարածաշրջան այցելողներից քչերն են ուշադրություն դարձնում դրան) նախազգուշացում է հրապարակված այն մասին, որ առանց ադրբեջանական իշխանությունների հատուկ թույլտվության նախկին Լեռնային Ղարաբաղի ինքնավար մարզ և հարակից 7 շրջաններ այցելող քաղաքացիներին ադրբեջանական կողմն արգելում է հետագայում մուտք գործել Ադրբեջան»,–ասել է Զախարովան։
«Համաձայնեցված փաստաթղթեր կան». Զախարովան` ղարաբաղյան հակամարտության մասին
Նրա խոսքով` դա արտացոլում է Ադրբեջանի իշխանությունների դիրքորոշումը։ ՌԴ ԱԳՆ դիրքորոշումը հակամարտության և դրա կարգավորման ուղիների վերաբերյալ լավ հայտնի է և անփոփոխ է մնում։
Ինչ վերաբերում է Արցախի վերջնական կարգավիճակին, ապա այն պետք է որոշվի ԵԱՀԿ Մինսկի խմբի շրջանակում քաղաքական բանակցությունների ճանապարհով։
«Ռուս քաղաքական գործիչները, օրենսդրական իշխանության, քաղաքացիական հասարակության ներկայացուցիչները համապատասխան հայտարարություններ են անում այդ թեմայով, ապա մենք ելնում ենք նրանից, որ դրանք արտացոլում են նրանց անձնական կարծիքը»,–նշել է Զախարովան։
Պաշտոնական տեսակետ են հայտնում գործադիր իշխանության համապատասխան մարմինները` նախագահի աշխատակազմը և ԱԳՆ–ն, ինչպես նաև այլ գերատեսչություններ։
Հայաստանն ինքնուրույն որոշումներ կայացնելու իրավունք ունի, իսկ մենք` գնահատելու. Զատուլին
Զատուլինը Ստեփանակերտում մասնակցել է «Արցախի բարեկամների համաժողովին»։ Դրանից հետո պաշտոնական Բաքուն բողոքի նոտա է հղել։ Մեկնաբանելով դա` Զատուլինն ասել է, որ նոտան չի կարդացել, բայց կարծում է, որ Բաքուն անպարկեշտ հիստերիաներ է բարձրացնում։
