ԵՐԵՎԱՆ, 17 հոկտեմբերի – Sputnik. «Սանիթեքը» ՍՊԸ-ն հերքում է «Ժողովուրդ» օրաթերթի այսօրվա համարում հրապարակված այն լուրը` իբր Մոսէսքո» ընկերությունը դատական հայց է ներկայացրել «Սանիթեք Ինթերնեյշնլի» դեմ։ Այս մասին հայտնում են «Սանիթեքի» հասարակայնության հետ կապերի բաժնից։
«Տեղեկացնում ենք, որ «Ժողովուրդ» օրաթերթում տպագրված «Մոսէսքո» ՍՊԸ-ն դատական հայց է ներկայացրել «Սանիթեք Ինթերնեյշնլ» ՍՊԸ-ի դեմ՝ հարկադիր սնանկ ճանաչելու պահանջով «լուրը» իրականությանը չի համապատասխանում և միտված է արատավորելու ընկերության գործարար համբավը»,- նշված է ընկերության տարածած հաղորդագրության մեջ:
Նշվում է, որ «Մոսէսքոյին» «Սանիթեք Ինթերնեյշնլի» պարտքը կազմում է շուրջ 14 միլիոն ՀՀ դրամ: Ըստ «Ժողովուրդ» օրաթերթի հրապարակման այդ պարտքը 500.000.000 դրամ է կազմում։
«Սանիթեքն» ընդդեմ Երևանի քաղաքապետարանի. դիմում են միջազգային արբիտրաժային դատարան
Ընկերությունը կոչ է անում զերծ մնալ ապատեղեկատվություն տարածելուց և պահանջում «Զանգվածային լրատվության մասին» ՀՀ օրենքի 8-րդ հոդվածով սահմանված կարգով հերքել հրապարակումը, հակառակ դեպքում ընկերությունը, ՀՀ օրենսդրությամբ սահմանված կարգով, կդիմի իրավունքի պաշտպանության այլ միջոցների։
Քաղաքապետարանը չի վախենում արբիտրաժային դատարանից. Մարությանը պատրաստ է դրան
Հիշեցնենք` «Ժողովուրդ» օրաթերթի այսօրվա համարում հրապարակված լուրի համաձայն` «Մոսէսքո» ՍՊԸ-ն դիմել է Սնանկության դատարան «Սանիթեք Ինթերնեյշնլին» սնանկ ճանաչելու պահանջով։
