Միջազգային իրավունքի մասնագետ, փաստաբան Արա Ղազարյանը Sputnik Արմենիայի հետ զրույցում նշում է, թե ինչու է Վենետիկի հանձնաժողովը սևեռվել մասնավորապես Սահմանադրական դատարանի դատավորների պաշտոնաթողության դրույթի վրա։ Ըստ Արա Ղազարյանի` Հայաստանի կառավարությունը դիմել է Վենետիկի հանձնաժողովին` խնդրելով կարծիք հայտնել այդ դրույթի վերաբերյալ։
«Վենետիկի հանձնաժողովը խստորեն հետևում է ռեգլամենտին, ըստ որի` պատասխանում է կոնկրետ այն հարցերին, որոնք անդամ պետություններն առաջադրում են»,–նկատում է փաստաբանը։
Նրա խոսքով` դատավորի անկախությունը նաև սոցիալական անկախության մեջ է, և եթե որևէ սոցիալական բարեփոխում է կիրառվում դատավորների նկատմամբ, ապա դա այնպես պետք է արվի, որ չազդի դատավորի անկախության վրա։
«Մասնավորապես, թոշակի հետ կապված որևէ կարգավորում չի կարող պարտադիր լինել։ Եվ հենց դա է պատճառը, որ Վենետիկի հանձնաժողովը նշել է, որ այդ դրույթը պետք է լինի կամավոր»,-մանրամասնում է Ղազարյանը։
Միևնույն ժամանակ, փաստաբանը նշում է, որ դատավորի անկախության գործընթացը բավականին տևական ժամանակ է պահանջում։
«Երբ քաղաքական օրակարգում կա քաղաքական ծրագիր՝ շատ կարճ ժամանակամիջոցում հասնել արդյունքների, բնականաբար, փորձ է արվում շրջանցել օրենքի գերակայությունը, գտնել կարճ ճանապարհներ, սակայն Վենետիկի հանձնաժողովն ըստ էության ասաց, որ չի կարելի մարդու իրավունքը, օրենքի գերակայությունը, դատավորի անկախությունը զոհել հանուն այդ նպատակների»,-ասում է Ղազարյանը։
Վեթինգ հայկական ձևով. նախարարությունում վստահեցնում են, որ «ոսկե միջին» է ընտրված
Վենետիկի հանձնաժողովը դրական է գնահատել Հայաստանում դատաիրավական բարեփոխումների փաթեթը։ Հանձնաժողովը նշում է, որ փաստաթղթում ընդգրկված առաջարկների գերակշիռ մասը համապատասխանում է եվրոպական չափանիշներին ու նպաստում կոռուպցիայի դեմ պայքարին՝ առանց սպառնալու դատական իշխանության անկախությանը։
Միևնույն ժամանակ, հանձնաժողովի եզրակացության մեջ հատուկ ուշադրություն է դարձվել Սահմանադրական դատարանի որոշ դատավորների վաղաժամ պաշտոնաթողության առաջարկին։ Վենետիկի հանձնաժողովը նշում է, որ այդ դրույթն անառարկելի կլինի միայն այն դեպքում, եթե դատավորների պաշտոնաթողությունը լինի խիստ կամավոր ու չխոչնդոտի Սահմանադրական դատարանի արդյունավետ գործունեությանը։
