Մթերման սեզոնն ավարտվում է և այս տարի խաղողի բերքը նախորդ տարվա համեմատ պակաս է 40 տոկոսով: Այս մասին Sputnik Արմենիայի հետ զրույցում ասաց խաղողագործների միության նախագահ Արտակ Սարգսյանը։
Կարկուտն այլևս ծեծած տեղը չի՞ ծեծի. ի՞նչ է շահելու գյուղացին գյուղապահովագրությունից
«Բերքահավաքից առաջ էլ հայտարարել էի այդ մասին և մեր կանխատեսումներն, ըստ էության, ճիշտ էին: Եղանակային անոմալ պայմանների պատճառով խաղողի բերքն այս տարի զգալիորեն քիչ էր: Դժվար է խաղող մթերող բոլոր ձեռնարկությունների ցուցանիշները մեկտեղել ու ասել՝ արդյո՞ք իրենց ուզած քանակությունը կարողացել են գնել, թե ոչ, թեև բերքի պակասությունը ենթադրում է, որ խաղողագործները չէին կարող նախապես պլանավորած քանակ ապահովել, եթե նախապես կողմերի միջև երկարաժամկետ պայմանագրեր չէին կնքվել»,- նշեց նա:
Խաղողագործների միության նախագահի փոխանցմամբ՝ փոխշահավետ պայմանագրեր կնքած սուբյեկտների մոտ բացն ավելի քիչ է, քանի որ այստեղ տարիների կատարած աշխատանքի արդյունք կա:
«Խաղողագործների մոտ ոչինչ չի փոխվել. 150 դրամի չափով գինը այս և նախորդ տարիներին պահպանվել է։ Խաղողագործների հիմնական դժգոհությունը կապված է ինքնարժեքի ու մթերվող գնի հետ, այսինքն՝ 120-125 դրամ ինքնարժեք ունեցող խաղողը մթերվում է 150 դրամով, գյուղացիների եկամուտը գրեթե ամեն տարի նույնն է, երբեմն էլ մթերման գինն իջնում է 10-20 դրամով»,- ասաց Սարգսյանը:
Ինչո՞վ է հեղափոխությունն օգնել հայկական խաղողին ու ի՞նչն է մոռացվել. փորձագետ
Ըստ նրա` բոլորին է հայտնի, թե ինչ խնդիրների առաջ են կանգնում գյուղացիներն՝ գարնանից մինչև բերքահավաք: Նրանք մեծ ծախսեր են անում, զգալի միջոցներ են ներդնում, որպեսզի կարողանան նորմալ, որակյալ բերք ստանալ, հետևաբար, խաղողագործն այդ գնով մթերումից գոհ լինել չի կարող, քանի որ ամենուր գնաճ է, իսկ խաղողի մթերման գինը նույնն է և նույնիսկ հասել է 2015 թվականի մակարդակին:
